Resson dei imatges dau Blagaire de l’IEO-06 Jan-Jaume de Niça ven de nen mandar la sieu 72ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Un còp èra una especialitat niçarda …
En despart dei cogordons que, maugrat lo sieu sempiterne festin primadier, a l’entorn deis arenas de Cimier, « La Mecque » dau campionat dau monde de pilo, siam totjorn dins l’esper dau sieu musèu, lei liumes de la comtea lei mai coneissuts dins lo monde entier son lei famosas bleas … bleas que lei agradan fòrça ai niçards …
Lei còstas, lo verd, lei fuelhas dins son entier, de trochas en tians, de borsas en flans, de soupas en saladas, de pelotons en tortas (saladas ò sucradas ) s’alestisson de mant un biais e lei trobarètz tanben, aquestei bleas, dins quauquei pastas, a la mòda nòstra, coma lei raiòlas e certans gnocchis.
Alora, farcejaires, farètz creire en degun que siam aquí en villa vielha, dau costat de la Pòrta Faussa ò dins lo canton de Santa Reparada, dins un pichin atalier de familha monte s’alestísson, seguissent una recepta gelosament tenguda secrèta, lei merdas de can : se vei manca pas la mendre poussa de farina de blad, la mendre briga de tartifla !
D’evidencia siam aquí dins l’usina FIAT (Fabricacion Industriala d’Antipastas Turinés)
monte, en plaça dei bleas nòstrei, alestisson lei merendas dei cans emé dei bleda-rabas.
Vos fau tanben notar que, maugrat toei leis esfòrç de son armada d’engenhaires, encò de Maranello, lei gents d’Enzo, an pas jamai capitat l’alestiment de gnocchis emé son fièr e auturós garalhon cabrat, pasmens abalit emé ren que de fen e de civada de tria !
JJ de Niça