Après 20 setmana de cors intensius sus Zoom, es estat decidat de si retrovar dau temps dei vacanças alentorn d’un aperitiu virtual e de contar basta lo « Que de nòu ? » e d’escambiar de maniera naturala. Una mena de « Cafè Occitan » qué !
Pasmens vos presentam lu tèxtes que nos son estats mandats.
Eran presents dau temps dei vacanças : Crestian, Joan-Pèire, Crestiana, Jouseta, Rogier e Marie-Do Maire, Gerald e Choaseta Clément.
Qué de nòu ?
Jouseta : Coma li a ren de nòu, vos parlarai de quauquei reflexions que mi fau sus leis accents, en escotant lei gènts parlar a la telè ò a la radiò. Es clar que, via la television mai tanben via lo fenomene dei braçatges de populacion, l’accent ponchut de nòrd de França s’es fòrt espandit en cò nòstre. Sembla que l’accent dau miegjorn siegue en perda de vitessa. Entre parentèsis, si ditz plus » le Midi » mai » le Sud « .
Ansin, la màger part dau temps, leis òmes e lei fremas politics elegits dins lei vilas dau miegjorn parlan ambé l’accent sensa color de la telè. Mai, coma son de meridionaus, de temps en temps laissan lo naturau tornar au galòp, maugrat seis esfòrçs per pas aguer l’accent d’aquí. E totei aquelei fuelhetons policiers que si passan a Marselha ò Niça e onte tot lo monde parla coma a París ?
JPB : Dau temps dau « cafè occitan » ò gòto de l’amistat es estat prepauat de bastir un Quizz, lo 19en. L’i avèm donat per nom « DE GEOGRAFIA E UN PAUC D’ISTÒRIA ». Aremerciam Jouseta Maurançay, Choaseta Clément, Marie-Do Maire, Crestian Desrumeaux, Rogier Gilli que n’ajudèron a alestir aquest quizz e que son estats lu premiers a mandar de questions. Lo juec es ja dins l’interfaça dau site e serà publicat lo 27 d’abriu. D’autri propòstas nen son arribadi coma aqueli de Crestiana que seràn integradi a de Quizz novèus. Per la setmana que ven lu cors repilheràn embé Zoom dins la « normalitat » se si pòu dire. Ne’n vequi un dei temas : « Lo virús Covid-19 a un un pauc mai d’un an. Posquessiatz v’adreçar directament au virús de la/dau Covid-19 que li diriatz ? Per s’interrogar, per li durbir lo vòstre còr, cridar mas de còups que l’i a … bessai l’aremerciar. A vautres d’escriure quauqui regas. » Esperam que lo subjèct interesserà lu nòstres escolans e bessai d’autres. Alora ai vòstres claviers !
