Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e quatre ans, lo 8 de junh de 1997. Òsca !
Cronica, dau 27 de març de 2022 en lenga nòsta per l’Agachaire
Lo jorn dau Beç
Au dire dau calendier republican, siam encuei au septidí sèt de Germinal, que l’i celebra lo beç (en francés « bouleau »), un aubre « qu’on trouve le long des graviers et dans les bois ombragés de la Haute-Provence » coma escriviá Onorat en 1846. Un sègle avans eu, l’abat De Sauvages notava a l’article « Bés » aquela curiositat exotica : « C’est avec des brins de bouleau qu’on fait à Paris les balais, & qu’on fouette les enfans ». D’aqueles Parisencs, pasmens !… Mistral apondet puei qu’èra pereu l’origina d’un nom de familha pron espandit en païs d’òc sota la forma Delbes, Derbez, e d’autrei formas.
Se dins d’unes païs l’òm a sovent utilisat sa rusca fina coma una mena de papier, son subretot lei nombrosas proprietats medicinalas de sei diferentes partidas que son conoissudas dins mantun endrech. Fuèlhas, fusta, ruscas, borrons, racinas, tot es agut estat utilisat, ò o es encara. Sensa parlar de la saba, sovent recercada, e que se retròba encuei a la mòda un pauc dins totei les païs, emai lo nòste onte sembla ben una innovacion recenta, que me diso qu’un d’aquestei jorns, faudrà ben que la tastèsso. Benlèu pas coma remèdi ni bevenda costumiera, mai just per sacher lo gost que pòt ben aguer. Emai lo printemps siegue sa principala sason de recòrda e lo moment onte, pareis, de ne’n beure fai lo mai de ben…
Jean Yves ROYER