Acampada Generala 2008 de l’I.E.O-06 a la Còla

Coma cada annada, l’A.G. de l’ieo-06 si debana en una vila diferenta dau departiment, après Grassa, Niça, Vallauria, Moans-Sartòu… aquest an siam estats aculhits a la Còla (de Lop). 92 sòcis e associacions afrairadi presents ò rapresentats, una capitada per la nòstra associacion. Aremerciam lo monde que si son desplaçats.

Aquí un rendut-còmpte per lu sòcis qu’an pas poscut li participar e aquelu que porrion èstre interessats per la nòstra associacion.

I – Rapòrt d’activitats de l’annada 2007 presentat per Joan-Pèire BAQUIÉ, President sortent a l’Acampada Generala dau 19 de genoier dau 2008 (a La Còla)

Cars amics e sòcis,

L’annada 2007 foguèt marcada, tra autres, per la manifestacion de Besièrs lo 17 de mars dont s’arecampèron 20 000 personas vengudi d’occitania tota, e quora dii tota pensi ben segur tant ai occitans que vivon sus lo territòri francés coma ai Aranés venguts d’Espanha e ai nòstri vesins dei valadas d’Itàlia ò de Guardia Piemontese (en Calàbria) que si desplacèron emb’au sieu premier Cònsol.
Era un moment istoric dirai, per toi aquelu que l’an viscut e qu’èran pòrta-bandieras de millierats d’autres que per de rasons diversi avion pas poscut li anar. Per cen qu’es de l’IEO-06 aviavam afitat doi carris de 50 plaças. Aremerciam lo monde que faguèron lo desplaçament.

Au dire de toi, la mobilizacion despassèt lo quadre militant. Per lo premier còup d’elegits venguèron numerós, emb’ai sieu sarpas d’elegit de la repùblica, faguèron lo passa-carriera embé nautres. Lu mediàs curbèron pron ben l’eveniment e fòrça monde de l’ieo-06 si posquèron veire sus TF1, France 3 ò en fòto dins de jornals. Au Gramon faguèriam una expausicion : revista de premsa e fòtos diversi e tanben una projeccion de fòtos e de films dins la sala de cors. D’uni fòtos si trovèron tanben sus lo site nòstre que li consacrèt mai d’un article. Aremerciam toi aquelu que nen mandèron de fòtos.

Vòli aremerciar Marcèu Mancini per lo travalh complit : devi dire que l’organizacion èra perfecha. Conservam toi en memòria lo bòn debanament d’aquesta jornada e se ne’n parla encara.

Aremercii la comuna de La Còla per lo prest d’aquesta « sala dei Ròsas » per tenir la nòstra A.G.

E aremercii tanben toi aquelu que si son desplaçats per l’A.G. qu’es un moment fòrt de la vida d’una associacion.

V’auguri segon la tradicion « una bòna annada 2008 ben granada e ben acompanhada », per vautres e li vòstri familhas. Merci en toi per lu vòstres vots de bòna annada e d’esper per 2008.

Vequí de’n premier lo rapòrt d’activitats per l’annada 2007

1° Li jornadas « Descuberta dau País » :

Vodrii començar per la vísita de Pezenàs, lo 18 de mars en seguida de la manifestacion de Besièrs. Li eravam 100, aculhits en lenga per Joan-Maria Nicolaï, sòci de l’ieo-34 e Claudi Alranc. Avèm descubèrt la vila vielha e lo pichin teatre de Pezenàs.

Lo 2 e 3 de junh lo monde de Grassa (20 personas) an fach una dimenjada a Crevós. An visitat l’abadia de Boscodon, Embrun. Son estats reçauputs per l’incargat a la curtura de Crevós, lo sera li es augut una vesprada : cants, danças e còntes. L’endeman lu socis an visitat un vielh molin restaurat e si son passejats…

Lo gramon a fach una sortida de fin d’annada escolara lo 17 de junh Ai roïnas de Casternòu- Vilavielha (li eravam 25). Françon Dalbera n’a fach una conferença en lenga, sus l’èrba dau prat, per n’esplicar l’origina dau vilatge. L’aremerciam per lo sieu travalh qu’es estat publicat sus lo site de l’ieo-06 (lo 5 de julhet).

Podem apondre la sortida dau Gramon (31 personas) lo 13 de novembre au teatre dau Cee per l’espectacle « Viva Garibaldi » de Serge Dotti e Aurélie Peglion.
Lo 16 de novembre li es augut una sopa au pisto a Sant Matieu de Grassa qu’a recampat 54 personas dins la convivialitat.

2° Lu ataliers de la seccion :

– Lu quatre cors de lenga setmaniers recampan sempre totplen de monde 75 personas (90 personas en 2006, 73 en 2005, 65 personas en 2004).

Per memòria citerai lo cors de Sant Jaume (20 escolans marcats) aqueu de la Còla (20 escolans marcats), aqueu de Montaurós (10 escolans marcats) bailejat da l’amic CHABAUD, aqueu de Niça (25 escolans marcats). Merci encara un còp ai professors Frederic MARTRON, Andrieu GOYOT, Andrieu SAISSIe ai escolans fedèls.
La demanda es importanta, mas coma lo sabetz mancam de professors. (Andrieu GOYOT, m’a demandat de li trovar quauqu’un per lo remplaçar per de rasons de santat. Pensi que si devem de trovar toi ensems una solucion.)

Despí la rentrada de setembre avèm a Niça l’ajuda de Maurís que fa un atalier de « Charaïssa » un còup cada tres setmanas per « desblocar la paraula ». (8 a 10 personas participan au talhier)

– Lu ataliers de danças populari d’òc recampan a Grassa cada 15 jorns toi lu afogats dei baletis (25-30 personas) sota la direccion de Choaseta GANDOLPHE e Maria Crestina BRAVET d’una part e Maria-Jousèp CARRERE e Joan-Pèire CHIAPELLO de l’autra, en alternança.

Aqueu de Niça que recampa una quinzena de persona, un còp cada tres setmanas a l’Agora Nica-Est. N’aprofiti per remerciar Choaseta GENTI l’animatritz d’aquest atalier.

– Per la segonda annada, a Niça un atalier de teatre bailejat da Joan-Pèire SPIES foncciona, recampa 6 a 8 personas. L’atalier si debana un còup cada tres setmanas. D’unu an participat, lo 11 d’octòbre, au « Cabaret d’òc » organizat per « Alp Harmonia » associacion afrairada a l’IEO-06. Merci a Joan-Pèire Spies, Arleta, Carlòta, Anna-Maria S.G, Luna e Bertin, de li aver participat.

LO GRAMON cèucle locau de l’IEO-06 a Niça :

Coma lo sabetz, LO GRAMON cèucle locau de l’IEO-06 participa tanben a l’organizacion d’un festenau inter-curturau despí 12 ans a l’Agora Nice-Est. Aquesta annada avèm aculhit lo divendre 23 de febrier MAURIS, Aurélie PEGLION e Serge PESCE qu’an cantat lo poèta Alan PELHON e la contairitz Annie LALIGANT, qu’a contat en francés e en niçard . Lo 23 de novembre li èran lo Còro dei Pimontés e lo grop « Bastian Contrari » (140 participants). Avèm tanben participat a la « Prima de la Poèsia » a l’Agora Nice-Est.
Lo 18 d’octòbre avèm organizat au castèu de Berra (dont si son creats li leis d’amor dei trobadors) una serada poètica embé Mauris, Serge Pesce e Barry Wallenstein (30 personas).

3° L’ensenhament

Per nautres es un sector clau. Coma lo diguèri l’an passat sostenem tant l’Ensenhament Public coma li Calandretas.

Siam mai que deçauputs per la politica de l’Estat rapòrt a l’ensenhament de l’occitan. Per 33 departiments dau domani occitan, la chifra dei pòstes au CAPES d’Occitan-Lenga d’Oc es de 4, coma l’an passat. En cò nòstre, 3 professors d’occitan-lenga d’òc si son descorats davant li misèrias de l’administracion : un es tornat au Consèu Generau, l’autre es anat sus un pòste dont ensenha pas plus la lenga e un autre es vengut provisor ajonch dins un licèu. Son pas estats remplaçats !

Dins lo primari sabem que lo pòste de conselher pedagogic « Lenga e Curtura Regionali » es estat atribuit de maniera provisòria a un conselher pedagogic despartementau en mùsica. Per lo moment li es degun qu’augue lo diplòma necessari per assegurar la releva. Encoratjam lu ensenhaires interessats a si marcar per lo passar.

La Calandreta de Drap contunha la sieu draia e lo sieu espandiment embé dificultat (per la 6ena annada). Per lo premier còup, aquest an, doi escolans son ientrats au CP (Magistra Florença BUATOY) , li es un cors adults a Drap (Animator Joan-Pèire SPIES, finda sòci de l’ieo-06). La chifra tròup bassa dei pichoi marcats es una empacha a la contractualizacion.

Au mes de julhet avèm portat lo nòstre sosten tecnic e pedagogic a l’Agora Nice-Est qu’avia organizat un « centre de lesers materno » per 45 pichoi. Lu projèct n’èra « Niça e la sieu curtura ». Au programa : ataliers de cant, de danças, rondas, còntes, juecs, cantats,e.c.a… La setmana s’es acabada per un balèti animat per lo grope Occitaniss’ (de l’IEO-06).

LO LABEL PARLESC : Parlar, Legir, Escriure

Es un label que l’IEO es a metre en plaça per lu cors d’occitan per adults. L’enquista es estada mandada per l’IEO en novembre dau 2006. Doi questionaris diferents son estats mandats : un per lu ensenhaires e l’autre per lu escolans. Probable que toi aquí l’avètz emplit. Lo tractament dei questionaris es estat fach fin dau 2006-principi dau 2007. Aquest projèct es sostengut per la Delegacion Generala a la Lenga Francea e ai lengas de França, lu consèus Regionaus d’Aquitània, Lemosin, Miegjorn-Pirenèus, Lengadòc-Rossilhon e Ròse-Aups.

1100 escolans e 110 formators an respondut a l’enquista. Dins un segond temps Micolau Genre, l’emplegat dau CREO-Provença a virat dins la region tota per faire emplir ai ensenhaires un autre questionari a la demanda de l’IEO-Nacionau. Aquò n’a permés de trovar de luecs dont si debanavan d’autres cors de lenga desconoissut per nautres. (Un document es estat estampat : Aprenem l’occitan. ! Recampa toi lu cors de la region Ròse-Aups e Provença-Aups-Còsta d’Azur.)
A terme, aquest label deuria rapresentar un « mai » per lu escolans e una reconoissença europenca d’aquest ensenhament per aquelu que l’auràn.

Li conferenças :

– Lo 27 de mars organizeriam a Niça un diaporama consacrat a Besièrs.
– Lo 22 de mai avèm fach venir Robèrt ROURRET au Gramon de Niça per lo sieu libre « La lenga dels Trobadors ». N’avèm fach lo rendut-còmpte sus lo site.
– Lo 17 de junh, l’ai ja dich, Françon DALBERA, faguèt una conferença sus lo vilatge de Casternòu-Vila Vielha.
– Lo 13 de novembre es Laurenç REVEST que venguèt a Niça per « Garibaldi dins la leteratura niçarda ».

4° La creacion :

Lu « Ressons d’Aquí » persegon la sieu vida sus « Nice-Matin » edicion Grassa. Es un travalh colectiu, l’avèm vorgut ensin. Avèm vorgut faire veire ai lectors qu’a l’ieo-06 li es un potenciau de gents qu’escrivon.

Aremercii toi aquelu qu’an escrich e demandi en aquelu qu’an pas fach encara lo pas de si mandar a l’aiga. Ancuei avèm despassat lo Resson 130 (es a dire 130 setmanas d’escritura), e avèm sempre da besonh de vautres per alimentar la nòstra cronica, qu’es tanben la vòstra. Vos convidi adonc a chifrar, a pantaiar, a escriure en lenga, sus Grassa e lo sieu relarg de segur, mas finda de vos durbir sus lo monde. Si devem pas embarrar ai pòrtas dau nòstre. La lenga d’òc pòu e deu parlar de tot.

Vòli aremerciar tanben Andrieu SAISSI au nom de toi, per lo sieu travalh de mesa en forma dei « Ressons » e dau travalh de ligason que fa embé Nice-Matin.
D’unu sòcis an tanben escrich per lo jornal « Aquò d’aquí » si felicitam d’aquesta iniciativa e convidam toi aquelu que lo vòlon, a faire parier. (Vos podem ajudar)

La difusion de la produccion occitana :

Coma cada annada es lo festenau de Moans-Sartòu au mes d’octòbre que dona l’ocasion la mai grana d’escambiar emb’au monde que visita lo nòstre estand, de si faire conóisser e de vendre la nòstra produccion. Rapòrt a l’an passat avèm un pauc mai vendut. Merceji toi aquelu, numerós e volontós, qu’an tengut l’estand au festenau de Moans.

Avèm tengut banc tanben lo 20 d’octòbre a Niça per la « Copa de França de Pilo » davant lo CAL bòn-Viatge. Lo marrit temps a un pauc escorchat la tenguda de l’estand. Davant lo CAL, li es un pilodròma, marcat per sòl a la pintura jauna, lo mòt pilodròma es marcat en lenga a la demanda de l’Agora Nice-Est e dau Gramon.

La comunicacion :

L’IEO-Nacionau a fach estampar un jornal « L’occitan… Qu’es aquò ? a 100 000 exemplaris en francés e 5 000 en englés per promoure l’occitan e sobretot per dire cu siam, e cen que volem. Es un document pròpi ben fach, l’avèm ja distribüit en lu cors, ataliers, au festenau dau libre de Moans, ai quatre jorns de « Festicant » : a Còntes, Coarasa, Pelhon, au CAL de Bòn-Viatge per la setmana niçarda, per la fèsta d’occitània organizada per lo CCOc-País-Nissart, eca…N’avèm encara a disposicion per aquelu que l’aurion pancara liejut e per de manifestacions a venir. Lu ressons qu’avèm a prepaus dau jornal son pròpi positius.

5° La vida de la seccion :

Eravam 167 sòcis a l’IEO-06 en 2007 (164 en 2006, 124 en 2005 ,135 en 2004). La chifra deuria montar encara en 2008, que lo sector de Niça es en bastison. Saludam doi novèli associacions afrairadi : La Dralha de Coarasa e « Sortie de Secours » l’associacion d’Annie Laligant. Una associacion de Gòrb pica a la nòstra pòrta (nos en parlerem quora serà afrairada).

Lo burèu s’es acampat 5 còps a Niça e a Grassa de maniera regulara en mai de l’AG de l’IEO lo 20/01/07 ; lo 03/02, lo 29/06, lo 03/10, lo 10/11. Devi mercejar lu membres dau burèu per la sieu ajuda. Avèm participat a un CA au CREO-Provença a Niça, lo 06/10 a Moans, un autre CA seguit de l’A.G. dau CREO-Provença (lo 17/11 a s’Ais de Provença).

6° Li nòstri relacions emb’ai associacions amigui :

La sinergia tra associacions a encara ben fonccionat aquest’an, Alp Harmonia, l’Escomessa, Piada Deliura, lo CCOc-País-Nissart, Sortie de secours (l’associacion d’Annie Laligant que cònta en lenga e en francés). Mas estent la chifra dei associacions afrairadi (10), podem pas èstre dapertot. Pensi que cauria qu’una persona dau C.A. siguèsse encargada especialament dei relacions emb’ai associacions. Signali que metem en rega, sus la telaranha tot cen que tòca a la vida e activitats dei associacions afrairadi.

Siam estats uros d’aculhir aquest’an una associacion novèla « Sota l’òrme« , que la sieu Presidenta Arleta PASTOR a presentat la tòca de la tota novèla associacion gorbarenca pròche Mentan.

7° Lo site de l’IEO-06 sus la telaranha

Despí lo mes de novembre dau 2004, l’ieo-06 a lo sieu site http://ieo06.free.fr/. Siam passats de 492 articles escrichs en 2005, a 784 en 2006 e mai de 1000 (10 48) en 2007 (1069 au jorn d’ancuei). Siam liejuts dins lo monde entier (mai de 138 492 personas, dins un centenau de país, an liejut 278 170 pàginas.
Mai de 1200 messatges son estats mandats per d’internautes sus lu foroms ò en respòstas a d’articles mes en rega. Aquò pòu semblar important mas mes en rapòrt embé la chifra dei articles (1069) fa pas mai d’un messatge per article. Ramenti que cadun pòu escriure per donar lo sieu avís sus d’un article, portar una contribucion, un desfolopament, encoratjar lu autors per lo travalh complit, e.c.a..
L’an passat avii mandat una chamada per m’ajudar a la gestion dau site e metre en rega d’articles. Maurís e Choasa Sgaravizzi son a si formar. Esperi que d’aquí gaire seràn lèsts a mandar d’articles sus lo malhum solets.

Aquelu que recevon pancara lu articles de l’ieo-06 sus la telaranha si porràn marcar per fins que li mandessiam tota l’actualitat occitana.

(149 visitas cada jorn de mejana sus l’annada dau 2007. 285 maximom après la manifestacion de Besièrs)

8° Li relacions emb’au monde politic

De mai en mai siam pilhat au seriós per lu politics, quau que sigue lo nivèu : comunau, despartementau, regionau, nacionau. Se si refudam a faire de politica politiciana, siam una associacion curturala, avèm lo dever de faire avançar li idèas curturali de l’IEO que conoissètz, quau que sigue lu interlocutors de drecha ò de seneca. Avèm adonc escrich ai 9 deputats e 4 senators dau despartament per fins que firmèsson una modificacion de la constitucion lo 15 de genoier d’aquest an (aquò a pas capitat coma lo sabètz cf : article 1061 sus lo nòstre site). Avèm escrich au president dau Consèu General dau 06 e au president de la Repùblica per li demandar parier (nos an promés de faire quauqua ren per nautres a la prima, da sègre adonc). Avèm escrich au 1ier Vici-President de la Region per fins que la region auguèsse un plan de desfolopament de l’occitan parier en aqueu de la Region Miejorn-Pirenèus.

9° Lu projècts
– La sinhaletica bilinga a Drap : lo projèct es acabat per l’ieo-06, es estat donat au cònsol de Drap que l’a presentat au Consèu Municipau que l’a votat a l’unanimitat (lo travalh aurà durat doi ans de temps). La mesa en plaça dei placas es estada retardada en rason dei subvencions que son pas arribadi a la comuna.

(plaque non contractuelle)

– Avèm escrich e rescontrat lo cònsol de la vila de Còntes qu’es lèst per associar l’IEO-06 au sieu projèct d’una sinhaletica bilinga e d’un musèu d’Art e Tradicions Populari per la sieu vila. La comuna de’n Bergier (Le Rouret) seria lèsta a faire parier per lo nom dei carrieras (Veire embé Maurici Casciani).

– Avèm lo projèct d’estampar un segond libret dei « Resson d’Aquí ». Avèm fach una demanda de subvencions au CREO-Provença que nos deuria ajudar. Sobran encara d’exemplaris dau premier libret que son sempre da vendre.

– Totjorn dins lo quadre de la socialisacion de la lenga avèm portat lo nòstre sosten lingüistic ai « Babaròtas » (mariòtas de Sergi Dotti), difusit sus França 3 (12 episòdis) e co-finançat per lo CREO-Provença, ajudat l’artista Ben per li sieu placas en lenga tot au lòng dei estacions dau trame niçard.

– Avèm lo projèct de faire de pichin films en niçard. Avèm ja començat embé « lo Mercat », « li vendemias », « lo banc dau pescaire », d’autres son en cors, coma « Li serps de Miquèu », « lo tren dei pinhas ». Tot aquò per « alimentar » lu cors de lenga dau nòstre relarg Joan-Pèire Spies, Anna-Maria Sgaravizzi-Garcia e ieu siam a veire coma utilizar aquest materiau.

II – Rapòrt Morau

Coma venetz de l’audir dins lo rapòrt d’activitats, l’annada 2007 foguèt rica d’eveniments, per lo nòstre travalh, li nòstri recercas, li nòstri creacions leterari, li nòstri activitats…

Avèm marcat de ponchs embé per exemple, la cronica « Resson d’Aquí » dins « Nice-Matin (Grassa) » que socializa la lenga despí doi ans pròch lo grand public, la dubertura d’un atalier de charaïssa a Niça que ven completar aqueu dei danças e dau teatre. Lo site de l’ieo-06 que contunha d’espantegar li idèas de l’ieo-06 en aquò nòstre e dins lo monde (1042 articles en 38 mes).

Mas coma lo diguèri l’an passat mancam encara de monde per assegurar la releva, de personas formadi, cen que si sònan de « quadres ». Avèm un dever de formacion devèrs lu autres e d’auto-formacion, toi tant que li siam.
Aquest an, siatz estats mai numerós a pilhar de responsabilitats e a vos engatjar dins la vida de l’associacion. Lu membres dau CA e dau burèu si son desplaçats de maniera regulara ai acamps. Vos remercii d’aquò e vos convidi a faire parier en 2008.

Andrieu, qu’es un dei cepons de l’ieo-06, lo sabètz, pensa a la sieu retirada l’an que ven en tant que segretari de l’ieo-06. S’es prepauat de formar lo sieu successor. Daniela Olivero a respondut positivament en aquesta chamada si prepaua au pòste de segretària-ajoncha e per lo remplaçar quora Andrieu ne’n farà demanda.

Cadun si deu pauar la question : « Que fau, que pòdi faire per ajudar l’associacion aquest an ? » Au darnier acamp de Niça si siam pensats per exemple d’editar d’afichas sus li activitats prepauadi per l’ieo-06 que porrion èstre messi a l’ocasion de manifestacions diversi coma lo festenau dau libre de Moans, lu baletis de la region, lo festenau inter-curturau de Bòn-Viatge, eca… De demandar a cada sòci de ne’n trovar un novèu e lo faire societar. Son de cauas simpli mas que porrion participar a l’espandiment de la nòstra associacion.
Lu burèu s’acampa un còup cada doi mes, mas es pas un burèu barrat, avèm da besonh de tot lo monde, basta ne’n faire la demanda e seretz lu benvenguts ai nòstri acamps.

Vodrii aprofitar d’aquest apontament per vos dire que l’axo premier de la nòstra politica curturala per 2008 serà la trasmission de la lenga e la curtura nòstri :

– Trasmission ben segur per lu cors, lu ataliers de danças dont la lenga deurà èstre mai presenta (demandi ai animators de l’emplegar lo mai possible en situacion), dins lu ataliers de charaïssa e de teatre a Niça.

– Trasmission per lu articles dins Nice-Matin ò lo jornal Aquò d’Aquí que socializan la lenga. (Avèm da besonh de materiau per alimentar la nòstra cronica.)
– Trasmission per lo site de l’ieo-06. Podètz mandar ai vòstres amics (-gas) ò collègas lu liames dei articles pareissuts sus lo site que vos an interessats. Es un pichin travalh per cadun mas que pòu menar de monde curiós a la lenga.

– Trasmission ai generacions novèli. Per exèmple embé la lectura en familha de libres en lenga ai vòstri pichoi ò felens. Lecturas organizadi dins de bibliotecas ò d’escòlas per de sòcis volontaris.

– Trasmission ai pichoi per l’ajuda pedagogica ai centres aerats qu’an per tòca la lenga e la curtura occitani. (cf. lo centre aerats materno de l’Agora Nice-Est)

– Trasmission per lu cants que sigon tradicionaus ò de creacion.
Li son mai d’una maniera de trametre la lenga e de metre en avant la nòstra occitanitat coma lo simple fach de s’adreiçar a un collega en lenga : « Adieu, coma va ? Fa pas caud ancuei ! » a vautres de li trovar, de li inventar… Aurètz de retorns, farètz anar avant la lenga en la socializant. (Per la pichina istòria vos vòli parlar d’un collèga non tubaire qu’avia sempre en man una cigareta « Camel » sota pretèxto qu’èra un nom de cigareta occitan e qu’èra un meso d’entrar embé l’autre en lenga.)

Siam anats filmar sus lo mercat a Niça a l’asard per faire un film en lenga. Siam estats estonats per la chifra dau monde que parlava e que nos regarjava positivament perque parlaviam niçard. Cau sortir dau pessimisme ambient que fa dire au monde : « Siam gaire a capir la lenga a la parlar ! » Non siam pas lu darriers dei Moïcans, li eravam 20 000 a Besièrs per la nòstra lenga.
La lenga, aquelu que la sabon, la devon emplegar. Se ne’n devon servir. Quora aurètz l’etiqueta « lenga » sus lo front, lo monde, vos parleràn en lenga. Siáu lest a ne’n faire l’escomessa e ne’n parlerem d’aquí gaire ensems.

L’IEO a publicat despí gaire un jornal « L’occitan qu’es aquò ? » publicat a 100000 exemplaris ; « Aprenem l’Occitan ! » a 3000 exemplaris per la region embé tota la tiera dei cors ; un catalògo dei libres publicats en la region (3000 exemplaris tanben). Tot aquò son d’aises per entrar en comunicacion emb’au monde. Se ne’n devem servir per faire saupre au monde qu’existam, que siam vius, siam de fremas e d’òmes que vivon en lo sègle XXI, qu’avèm una lenga milenària e que la volem aparar.

Valorizar la diversitat dau monde comença embé la lenga d’òc : lo niçard, lo provençau, per nautres.

En Espanha e en Itàlia la nòstra lenga a un vertadier estatut, lo sabètz. Es reconoissuda coma cò-lenga nacionala, a l’IEO travalham per la sieu reconoissença en cò nòstre. Ensems li arriberem.

Lo 17 de març avèm fach audir li nòstri votz a Besièrs. Lo nòstre moviment curturau pilha d’envam, de fòrça despí Carcassona. Començam de rescontrar un moviment de simpatia dins la populacion e d’unu elegits, que sigon de drecha ò de seneca, an començat a pilhar la mesura de la nòstra demanda curturala.

Per acabar dirai que toti li demandas exprimadi per l’IEO dins lo domani de l’ensenhament, la creacion, lu mèdias e la vida publica an per tòca de crear un contèxto favorable a la recuperacion de la lenga, au restabliment de la transmission familiala e au desfolopament dau biais de viure portat per la curtura e la lenga occitani.

Aquesti demandas s’adreiçan ai colectivitats locali (comunas, comunautats de comunas, despartaments, regions) e a l’estat. Cadun deu pilhar en carga cen qu’es de la sieu responsabilitat.

Es a l’Estat d’adaptar la sieu legislacion.

La nòstra accion a per amira la preservacion de la diversitat culturala e lingüistica e demanda lo respècte dei drechs de la lenga occitana.

Podetz comptar sus l’IEO per desfendre lu vòstres drechs lingüistics e culturaus coma sabem que podem comptar sus de vautres.

Vos demandi de votar per aquest rapòrt d’activitats e aquest rapòrt morau.
La Còla lo 19 de genoier dau 2008

Joan-Pèire BAQUIE President sortent de l’IEO-06