Bòna Annada 2009

Cars amics e sòcis,

A vautres toi visitors dau monde entier (184 220 visitors), que trevatz li pàginas (363 360 liejudi) dau site nòstre, v’auguram una pròpi bòna annada 2009, ben granada e ben acompanhada.

Vos esperam encara mai numerós en lo 2009 a legir lu nòstres articles e a participar ai activitats de l’IEO-06 e aqueli dei 15 associacions afrairadi. L’annada 2008 siguèt aquela de l’espandiment de la nòstra seccion embé 5 cors de lenga, 2 ataliers de danças tradicionali, un de teatre, de charaïssa, de cant tradicionau, de música, de descuberta dau país, la cronica setmaniera « ribon-ribanha », la dubertura de la nòstra biblioteca-cedeteca a Niça, eca…

L’an 2009 serà aqueu de la consolidacion de la nòstra estructura. Avèm besonh de toi e v’aperem toi a l’AG dau 17 de genoièr a Grassa per ne’n discutre.

Per li nòstri lengas de França e/ò minorizadi, auguram un desfolopament dins l’ensenhament, lu medias, la creacion, la vida publica.

Ramentam que l’occitan es ja cò lenga nacionala en Espanha dins Val d’Aran e en li Valadas Occitani d’Itàlia, embé lu drechs e devèrs que van ensems. Que, se dins la Constitucion l’Article 75-1 ditz:  » Li lengas regionali apartenon au patrimòni de França. » (21 de julhet dau 2008), lo camin serà encara lòng per una vertadiera reconoissença de l’occitan. Esperam per lo 2009 una lei dicha « quadre » per li lengas de França e es per aquò que l’IEO serà a Carcassona lo 24 d’octòbre dau 2009.