Acampada Generala 2009 de l’IEO-06

I – Rapòrt d’activitats de l’annada 2008 presentat per Joan-Pèire BAQUIÉ, President sortent a l’Acampada Generala dau 17 de genoier dau 2009 (a Grassa)

Cars amics e sòcis,

L’annada 2008 foguèt marcada, per la despartida d’amics e sòcis de la nòstra associacion IEO, Andrieu GOYOT conoissut e estimat da toi qu’avèm acompanhat lo 26 de mai a la catedrala de Grassa. Per ieu Andrieu èra l’exèmple d’un òme sensible e exigent en mai d’èstre un amic. Coma l’escriguèt Andrieu SAISSI, aquesta sensibilitat transpareissia sempre en lu escrichs sieus, eu lo borguinhon que s’èra mes a estudiar e escriure en lenga d’òc. (Ramenti qu’avia augut, tra autres, lo premier premi de la novèla per « Nivolet » que l’ieo publiquet).

Lo meme jorn Guiu MARTIN, president d’onor dau CREO-Provença, moriguèt. Era un grand militant, un amic, un saberut, un grand pedagòg de la lenga nòstra, èra un pauc per lu occitanistas de Provença, lo mèstre de toi. Aquí tanben es una gròssa pèrdita per lo nòstre moviment. Ramenti qu’escriguèt la gramàtica provençala embé Bernard Molin e lo diccionari Provençau-Francés en collaboracion embé Jòrgi Fettucciari e Jaume Pietri. Doi otís qu’utilizam au quotidian.

Vos demandi de perpensar ai nòstri amics, a cen qu’avèm viscut de bèu ensems dins una minuta de silenci per memòria dei nòstres amics.

Mercí.

Aremercii la comuna de Grassa per lo prèst d’aquesta sala per la tenguda de la nòstra A.G.

E aremercii tanben toi aquelu que si son desplaçats per l’A.G. qu’es un moment fòrt de la vida d’una associacion.

V’auguri segon la tradicion « una bòna annada 2009 ben granada e ben acompanhada », per vautres e li vòstri familhas. Merci en toi per lu vòstres vots de bòna annada e d’esper per 2009.

Vequí de’n premier lo rapòrt d’activitats per l’annada 2008

1° Li jornadas « Descuberta dau País » :

Avèm organizat una sortida a Gòrb lo diménegue 8 de Junh. Si siam retrovats mai d’un centenau embé l’associacion Sota Òrme (afrairada a l’IEO-06). La vísita s’es debanada en gorbaïn. Toi aquelu que son venguts garderàn en ment l’organizacion perfècta e l’acuelh que nos es estat fach. Au mes de febrier venent farem un acamp emb’ai responsables de Sota Òrme per metre au ponch una vísita de Grassa per lu nòstres amics. Aremerciam Arleta Pastor e Joan-Pèire Spies encara per l’acuelh.

Au mes d’octòbre (dau 26 au 28), 43 personas de l’IEO-06 s’enanèron 3 jorns rescontrar lu caminaires partits o 30 d’avost de Dronier (Dronero) per rajonher Val d’Aran. La tòca d’aquesta caminada : faire marcar l’occitan au patrimòni immateriau de l’umanitat. Un viatge meravilhós de 3 jorns que devèm tra autres a Evelina MAIOLINO e Maurici CASCIANI que si son entrevats de tota l’organizacion.

2° Lu ataliers de la seccion :

– Lu cors de lenga setmaniers, 2 de mai aquest an, es a dire 5, recampan sempre totplen de monde 88 personas (75 en 2007, 90 personas en 2006, 73 en 2005, 65 personas en 2004).

Per memòria citerai lo cors de Sant Jaume (20 escolans marcats) aqueu de la Còla (20 escolans marcats), lu 2 de Niça (38 escolans marcats) e en mai, aquest’an lo cors de Drap (10 escolans). Una capelada ai professors : Anna-Maria SGARAVIZZI-GARCIA, Frederic MARTRON, Andrieu SAISSI, Joan-Pèire SPIES, lo vòstre servitor e ai escolans fedèls.

La demanda es importanta, d’autri comunas coma, tra autres, « Rocafòrt » nen demandan, mas coma lo sabètz mancam de professors.

Per la segonda annada avèm a Niça l’ajuda de Maurís que baileja un atalier de « Charaïssa » un còup cada tres setmanas per « desblocar la paraula ». (8 a 10 personas participan au talhier)

– Lu ataliers de danças populari d’òc recampan a Grassa cada 15 jorns toi lu afogats dei baletis (25-30 personas) sota la direccion de Choaseta GANDOLPHE e Maria Crestina BRAVET d’una part e Maria-Jousèp CARRERE e Joan-Pèire CHIAPELLO de l’autra, en alternança.

Aqueu de Niça que recampa un dezenau de personas, un còup cada tres setmanas a l’Agora Nica-Est. Mancam un pauc de monde, mandi una chamada ai balarinas e balaires que nen porrion rajónher. N’aprofiti per remerciar Choaseta GENTI l’animatritz per lo sieu travalh.

Per la terça annada, a Niça un atalier de teatre bailejat da Joan-Pèire SPIES fonciona, recampa 10 personas. L’atalier si debana un còup cada tres setmanas. D’unu an participat en octòbre, au « Cabaret d’òc » organizat per « Alp Harmonia » associacion afrairada a l’IEO-06. Mercí a Joan-Pèire Spies, Arleta, Anna-Maria S.G, de li aver participat. Siáu totplen content que de joves collegians li participan coma Juliette e Fabien. Lo 15 de decembre l’atalier teatre faguèt mòstra de tot cen qu’avion emparat au darrier trimestre de l’an.

Lo 22 d’abriu venguèron au Gramon de Niça per la sieu peça « Que vi venguèsse…e ben Mercí » la chorma de Barba Zon embé Irena Marino, Glaudo Bellucci (sòci de l’ieo-06) e Becho Laura, l’autor de la peça. (50 personas)

L’atalier de cant : Es un novèu atalier que si debana cada 3 setmanas a Niça embé Joan-Pèire AIPERTO. (10/12 personas marcadi). Cau dire qu’avèm augut l’onor de lu escotar – èra lo premier còup – per la venguda de Naoko SANO a Niça (lo 9 de decembre) e lo travalh fach en gaire de temps per Joan-Pèire e lu sòcis es remirable.

L’atalier de música a tanben començat aquest an (5 personas marcadi) li juegan lo repertòri tradicionau. Es Manon GENTI que baileja l’atalier, son toi de joves a li participar e aquò nen ralegra.

L’atalier bibliotèca. Es Carlòta RUBINI que s’entreva d’aquò cada diluns e dimars presta de libres ò de CD ai sòcis que lo desiran. A fach la tiera de toi lu libres e CD a disposicion. Carlòta revira finda de pichins libres per lu escolans de la materna e de l’elementari.

LO GRAMON cèucle locau de l’IEO-06 a Niça :

Coma lo sabètz, LO GRAMON cèucle locau de l’IEO-06 participa tanben a l’organizacion d’un festenau inter-curturau despí 13 ans a l’Agora Nice-Est. Aquesta annada avèm aculhit lo 22 de novembre lo Grope Zaragraph e Ting e Bang. Lo 14 de febrier dau 2009 seràn la companhia Montanaro e Al Maoussilia Vos esperam numerós per aquest espectacle que serà de qualitat.

3° L’ensenhament

Per nautres es un sector clau. Coma lo diguèri l’an passat sostenèm tant l’Ensenhament Public coma li Calandretas.

Siam sempre deçauputs per la politica de l’Estat rapòrt a l’ensenhament de l’occitan. Per 33 departiments dau domani occitan, la chifra dei pòstes au CAPES d’Occitan-Lenga d’Oc es de 4, coma l’an passat.

Doi pòstes de professor d’escòla abilitats a l’ensenhament dei lengas regionali son estats creats l’an passat dins lo 06. Un novèu lo serà aquest an. Demandam la creacion d’una escòla bilinga a Niça. Avèm parlat embé Steve BETTI novèu encargat de mission Lenga e Cultura Regionali pròche lo Rector, que sosten aquest projèct, mas que per aüra es en de tiradors (afaire da segre).

La Calandreta de Drap a fach sant miquèu a Niça despí lo mes de setembre. Avèm gaire de nòvas, mas la situacion sembla gaire bòna. Carlòta a pilhat lenga emb’ai responsables per lu ajudar.

Lo diménegue 18 de mai, 7 personas de l’IEO-06 participèron au Vau, a un rescòntre regional d’ensenhaires de cors adults. La tòca d’aquest rescòntre :

– escambiar, metre experienças e problèmas en comun… veire, trobar de solucions ò melioracions…
– començar tanben de chifrar au biais de mielhs comunicar sus l’oferta de cors per adultes… per ne’n desfolopar lo malhum e alargar lo public…

Siguèriam aculhit da Reinat TOSCANO de l’IEO-83 e la cònsola de la comuna dau Vau venguèt saludar en provençau aquesta iniciativa dau temps de l’aperitiu.
Aquest rescòntre fuguèt fruchós e recampèt 19 personas. En fin de jornada nos fuguèt prepauat una visita de la vila dau Vau en lenga.

Mapa dei cors adults d’occitan : L’ieo-06 a realizat l’an passat una mapa dei cors de lenga sus l’ensems de l’espaci occitan. Repilha lo document papier « Aprenem l’occitan ! L’occitan, je m’y mets ! » Li son 250 cors sus d’aquesta mapa que s’atròva sus « Google Maps ». La mapa dona lo luec precís dau cors, lo nom de l’animator, lo jorn, l’ora, lo nom de l’associacion organizatritz, lo camin per li anar. Mai de 16 000 personas l’an ja visitada (per 3 000 l’an passat).

Dictada occitana : L’IEO-06 organizava, per lo premier còup, lo 26 de genoier dau 2008 a Niça la dictada occitana. 39 personas vengudi dau Gramon, dau CCOc-Pais Nissart, de la Calandreta de Drap li participèron. Lo Grop Occitaniss’ n’assegurèt l’animacion. Miquèu PALLANCA, professor d’occitan-Lenga d’òc, presentèt la dictada tracha d’una novèla sieua denant de la legir. En lo 2009 serà tanben organizada lo 31 de genoièr a Niça per l’ieo-06 e dins 41 vilas de l’espaci occitan e de Catalunha. Aquest an serà Steve BETTI que liejerà la dictada. Lu nòstres amics de l’Escomessa l’organizeràn lo meme jorn a Canas, toi lu sòcis de l’ieo-06 dau relarg grassenc seràn coma l’an passat lu benvenguts.

Li conferenças :

– Lo 26 de Febrier Mirelha BONETTO e Miquèu PALLANCA tot’ai doi professor d’occitan-lenga d’òc son venguts prepauar una conferença que lo tèma èra li « MINUTAS » RADIOFONIQUI DE FRANCIS GAG. (50 personas) Da signalar que lo document es dins li 2 grafias.

– Lo dimarç 8 d’abriu, Didier LANTERI, conoissut sus lo site de l’ieo-06 sota l’escainom de DLM nen faguèt la jòia e l’onor d’una vísita au Gramon de Niça. Cau dire per aquelu que lo conoisson pas’ncara qu’es l’autor d’un diccionari francés-brigasc e qu’escriu finda en niçard. Avia fach lo desplaçament despí lo departiment dau 01 (Ain) e ne’n siam reconoissent.

– Lo 27 d’octòbre Andrieu SAISSI faguèt una conferença sus lo Catarisme e la Crosada dins lo carri que nen menava a Montsegur (43 personas l’i participèron). Lo tèxto de la sieu dicha s’atròva sus lo site de l’IEO-06 : http://ieo06.free.fr/spip.php?article1343 per aquelu que posquèron pas venir.

– Lo 9 de decembre Sano NAOKO, professora de la Facultat dei Scienças Umani e Sociali, Universitat de Nagoya au Japon faguèt la sieu comunicacion : «Cal far la fèsta» ?- l’identitat occitana e la cultura regionala. 70 personas venguèron l’escotar. Per l’ieo-06 que la convidèt foguèt un grand moment de la vida de la nòstra associacion.

4° La creacion :

Après 156 setmanas de vida lu « Ressons d’Aquí » si son arrestats sus « Nice-Matin » edicion Grassa. Era un travalh collectiu, que s’es fermat que lu tèxtos defautavan. Vòli aremerciar Andrieu SAISSI au nom de toi, per lo sieu travalh de mesa en forma dei « Ressons » e dau travalh de ligason qu’a fach embé Nice-Matin e que durèt 3 ans.

D’unu sòcis provan de faire viure l’escrich d’una autra maniera sota l’iniciativa d’Anna-Maria MILARDI. An creat sus lo nòstre site la cronica « Ribon-Ribanha » e que fonciona despí lo 2 de novembre dau 2008 (ribonribanha@yahoo.fr) 11 personas diferenti an ja mandat d’escrichs per lo moment basta en niçard per un vintenau de tèxtos escrichs, desesperam pas de ne’n veire arribar en provençau ò en aupenc.

Despí un an Joan-Ives ROYER nen manda la sieu cronica de l’agachaire en aupenc. Es una cronica que passa cada dissabta sus lo jornau « La Provence » e tanben sus lo nòstre site ieo-06.

La difusion de la produccion occitana :

Coma cada annada es lo festenau de Moans-Sartòu au mes d’octòbre que dona l’ocasion la mai grana d’escambiar emb’au monde que visita lo nòstre estand, de si faire conóisser e de vendre la nòstra produccion. Rapòrt a l’an passat avèm un pauc mai vendut. Merceji toi aquelu, numerós e volontós, qu’an tengut l’estand au festenau de Moans. Bessai que cauria faire una comission per la cròmpa de libres novèus. Aquí tanben es un afaire da segre. Aremerciam Enric BONÉ que s’entreva de la gestion e de l’estòc dei libres.

La comunicacion :

L’IEO-Nacionau a fach estampar una novèla version dau jornal « L’occitan… Qu’es aquò ? ». En mai dau francés e de l’englés, existe aüra en italian e alemand. La tòca es de promòure l’occitan e sobretot per dire cu siam, e cen que volèm. Es un document pròpi ben fach, l’avèm ja distribüit en lu cors, ataliers, au festenau dau libre de Moans, ai quatre jorns de « Festicant » : a Còntes, Coarasa, Pelhon, au CAL de Bòn-Viatge per la setmana niçarda, eca…

A l’ieo-06 avèm publicat un document en color que presenta toti li activitats de l’ieo-06.

5° La vida de la seccion :

Eravam 167 sòcis a l’IEO-06 en 2008 (167 sòcis en lo 2007 164 en 2006, 124 en 2005 ,135 en 2004). La chifra deuria montar encara en 2008, que lo sector de Niça es en bastison embé la creacion d’ataliers novèus (4 de mai aquest’an) e de Drap embé l’atalier novèu de lenga. Saludam doi novèli associacions afrairadi : l’associacion Sota l’Òrme de Gòrb e l’associacion « D’Aqui d’Aià ».

Lo burèu s’es acampat 5 còps a Niça, Moans e a Grassa de maniera regulara en mai de l’AG de l’IEO lo 19/01/08, lo 23/02, lo 26/04, lo 29/11. Devi mercejar lu membres dau burèu per la sieu ajuda. Avèm participat a un CA au CREO-Provença lo 06/10 a Moans e a un autre CA seguit de l’A.G. dau CREO-Provença, lo 15/11 (au Vau dins Var).

6° Li nòstri relacions emb’ai associacions amigui :

La sinergia tra associacions a encara ben foncionat aquest’an, Alp Harmonia, l’Escomessa, Piada Deliura, lo CCOc-País-Nissart, Sortie de secours (l’associacion d’Annie Laligant que cònta en lenga e en francés), Sota l’Òrme… Cristòu DAURORE a començat un travalh pròche li associacions afrairadi (12). A pilhat lenga embé cada associacion que d’uni an mandat lo programa dei sieu activitats per l’annada. Signali que metèm en rega, sus la telaranha tot cen que tòca a la vida e activitats dei associacions afrairadi. La tòca seria tanben de presentar cada associacion dins un desplegant coma aqueu que fagueriam en lo 2008 per l’IEO-06.

Rescontreriam lo 6 de junh, la Calandreta Leon Còrdas (collegi) en vísita a Niça embé la classa d’Anna-Maria Sgaravizzi-Garcia e lo grope Occitaniss’ que nen faguèt balar.

7° Lo site de l’IEO-06 sus la telaranha

Despí lo mes de novembre dau 2004, l’ieo-06 a lo sieu site http://ieo06.free.fr/. Siam passats de 492 articles escrichs en 2005, a 784 en 2006, 1048 en 2007, 1408 en lo 2008. Siam liejuts dins lo monde entier (mai de 183 550 personas, dins un centenau de país, an liejut 362 176 pàginas).

Mai de 1700 messatges son estats mandats per d’internautes sus lu foroms ò en respòstas a d’articles mes en rega.

L’an passat avii mandat una chamada per m’ajudar a la gestion dau site e metre en rega d’articles. Anna-Maria MILARDI s’es formada e a ja mes en rega mai de 20 articles. Es una ajuda precioa per ieu que siáu pas plus solet a saupre manejar lo site dau dedintre e que mi pòu remplaçar sensa minga problèma.

Aquelu que recevon pas’ncara lu articles de l’ieo-06 sus la telaranha si porràn marcar per fin que li mandessiam tota l’actualitat occitana, practicament un article cada jorn.

8° Li relacions emb’au monde politic

De mai en mai siam pilhat au seriós per lu politics, quau que sigue lo nivèu : comunau, despartementau, regionau, nacionau. Se si refudam a faire de politica politiciana, siam una associacion curturala, avèm lo dever de faire avançar li idèas curturali de l’IEO. Avèm escrich ai 9 deputats e 4 senators dau despartiment per fin que modifiquèsson la constitucion e li encludre li lengas de França. Lo 21 de julhet d’aquest an aquò a capitat coma lo sabètz embé l’article 75-1 que ditz : « Li lengas regionali apartenon au patrimòni de França. ». Per nautres es un premier pas mas que deuria si doblar d’una lei dicha « quadre » per lo 2009. Serem atentiu en aquò, volèm pas d’una grueia d’òu vueia.

9° Lu projècts

– La sinhaletica bilinga en Bergier (Le Rouret) : lo projèct auguèt un resson favorable pròche lo Cònsol, rescontreriam ja una ajoncha dins un acamp fruchós.

– La comuna de Coarasa n’a demandat de l’ajudar a revirar lo sieu site oficiau en lenga. Avèm respondut positivament en aquesta demanda.

– Avèm coma lo sabètz lo projèct de faire de pichin films en niçard. Avèm ja començat embé « lo Mercat », « li vendemias ». Venèm de reçaupre lo materiau per ajudar en aquò (camera, retro-projector, pichin micrò) d’una subvencion dau Consèu Regionau via lo CREO-Provença.

– L’organizacion de doi (ò mai) caminadas per ajudar a faire marcar la lenga d’òc au patrimòni mondial de l’umanitat. La tòca es de mediatizar aquesti caminadas que si faràn dapertot sus l’espaci occitan. De faire firmar lo mai possible d’elegits que s’atròvan sus lo percors. S’agís pas de faire 1300 qm, mas perqué pas anar de Còntes a Drap e d’en Bergier a Rocafòrt ò Upi per exemple. Lo camin si porria sonar « camin de la lenga d’òc ». Aquesti caminadas si deuràn faire tra lo 1ier d’abriu e lo 23 d’octòbre.

– L’organizacion de la manifestacion a Carcassona lo 24 d’octòbre. Emb’una noveutat aquest an : 1500 a 2000 personas que canterion ensems 10 cançons dau repertòri tradicionau. La tòca es de faire venir de monde novèus. Avèm ja pilhat lenga embé 5 companhias de carris. Vos demandam de respòndre numerós en aquesta chamada que serà festiva coma de costuma embé la vísita de Narbona lo 25 d’octòbre.

– Esperi/am tanben d’estampar la segonda annada dei « Resson d’aquí » es un projèct que li teni, qu’es lo travalh de totplen de sòcis que li an participats, que volèm conservar e faire conoísser a d’autres, dins de cors de lenga per exèmple. Aquò segur serà foncion dei nòstri finanças e de subvencions eventuali.

– La participacion a l’acamp au rectorat sus li lengas regionali que si farà au mes de mai. Steve BETTI a demandat que li participessiam. A nautres de faire de propòstas. Mas sabèm que la comission que s’acampa l’es a titre consultatiu e qu’a gaire de poder.

– Lo sostèn au cors de Grassa embé per exemple l’organizacion de conferenças coma si fan a Niça. Porriam faire venir a la prima Felipe MARTEL, cercaire au CNRS per parlar de Mirelha, l’òbra de Mistral, que si festejeràn lu 150 ans aquest an. Lu grassencs porrion n’aprofitar per estudiar de tròç de l’òbra per poder escambiar emb’au conferencier lo jorn dich. L’atalier de teatre porria tanben venir un jorn a Grassa per ajudar a la mesa en plaça d’una serada « Cadun es cantaire cadun es contaire ».

II – Rapòrt Morau

Coma venètz de l’audir dins lo rapòrt d’activitats, l’annada 2007 foguèt rica d’eveniments, per lo nòstre travalh, li nòstri recèrcas, li nòstri creacions leterari, li nòstri activitats…

Avèm marcat de ponchs pròche lu elegits, que sigon de drecha coma de seneca, travalham embé toi lu democratas. La nòstra soleta politica es aquela de la lenga.
Li a de demandas per l’ensenhament e la socializacion de la lenga. Per exèmples a Rocafòrt, a Contes, en Bergier, a Coarasa per citar basta 4 comunas demandairitz.
Avèm dubèrt 4 ataliers novèus a Niça, 1 a Drap que vènon completar aquelu ja en plaça e lo nòstre malhum s’alarga. Lo site de l’ieo-06 que contunha d’espantegar li idèas de l’ieo-06 en aquò nòstre e dins lo monde (1415 articles en 50 mes).

L’an 2009 serà l’annada de la consolidacion, se si devèm de creísser, lo devèm faire embé judici, per pas metre en perilh la nòstra estructura. A tròup faire, si porria anar en toi lu sens. Devèm creísser emb’ai nòstri possibilitats.

Mas coma lo diguèri l’an passat mancam encara de monde per assegurar la relèva, de personas formadi, cen que si sònan de « quadres ». Avèm un dever de formacion devèrs lu autres e d’auto-formacion, toi tant que li siam.

D’unu l’an ja fach, aquest an, siatz estats encara mai numerós a pilhar de responsabilitats e a vos engatjar dins la vida de l’associacion. Lu membres dau CA e dau burèu si son desplaçats de maniera regulara ai acamps. Vos remercii d’aquò e vos convidi a faire parier en 2009.

Andrieu, qu’es un dei cepons de l’ieo-06, lo sabètz, a desirat laissar la sieu plaça de secretari de la seccion a comptar d’aquesta annada. Acceptam embé regrets la sieu decision. L’aremerciam per tot lo travalh realizat per l’IEO-06. Va continuar d’èstre embé nautres au C.A. e lu sieus consèus seràn sempre preciós.

A l’ieo-06 avèm da besonh de toi. Cadun li deu trovar la sieu plaça. Demandam a cada sòci de ne’n trovar un novèu e lo faire societar. Es una cauas simpla mas que porria participar a l’espandiment rasonabla de la nòstra associacion.

Lo burèu s’acampa un còup cada doi mes, mas es pas un burèu barrat, avèm da besonh de tot lo monde, basta ne’n faire la demanda e seretz lu benvenguts ai nòstri acamps.
Vodrii aprofitar d’aquest apontament per vos dire que l’axo premier de la nòstra politica curturala per 2009 serà coma l’an passat la trasmission de la lenga e la curtura nòstri :

– Trasmission ben segur emb’ai cors, (rementi que l’ieo-06 n’a dubert 2 de mai aquest’an) lu ataliers de danças dont la lenga deurà èstre mai presenta, dins lu ataliers de charaïssa e de teatre, de cant a Niça.
– Trasmission per lo site de l’ieo-06. Podètz mandar ai vòstres amics (-gas) ò collègas lu liames dei articles pareissuts sus lo site que vos an interessats. Es un pichin travalh per cadun mas que pòu menar de monde curiós a la lenga.
– Trasmission ai generacions novèli. Per exemple embé la lectura en familha de libres en lenga ai vòstri pichoi ò felens.
– Trasmission per lu cants que sigon tradicionaus ò de creacion.

Li son mai d’una maniera de trasmetre la lenga e de metre en avant la nòstra occitanitat.
La lenga, aquelu que la sabon, la devon emplegar. Se ne’n devon servir. Quora faguèri visitar en lenga la vila de Niça a Naoko SANO, siam estats arrestats mai d’un còup per de monde urós de veire que la lenga si parlava encara per carrieras, si cresion que Naoko èra niçarda (un bèu compliment). Quora aurètz l’etiqueta « lenga » sus lo front, lo monde vos parleràn en lenga.

L’IEO a publicat una segonda edicion de « L’occitan qu’es aquò ? » en francés, englés, italian, alemand ; « Aprenem l’Occitan ! » a 3000 exemplaris per la region embé tota la tiera dei cors ; un catalògo dei libres publicats en la region (3000 exemplaris tanben). Tot aquò son d’aises per entrar en comunicacion emb’au monde. Se ne’n devèm servir per faire saupre au monde qu’existam.

Valorizar la diversitat dau monde comença embé la lenga d’òc : lo niçard, lo provençau, l’aupenc per nautres.

En Espanha e en Itàlia la nòstra lenga a un vertadier estatut, lo sabètz. Es reconoissuda coma cò-lenga nacionala, a l’IEO travalham per la sieu reconoissença en cò nòstre, avèm ja capitat de faire metre l’article 75-1 dins la constitucion. Mas aquò basta pas.

Lo nòstre moviment curturau pilha d’envam, de fòrça despí Carcassona e Besièrs. Lo 24 d’octòbre esperam d’èstre encara numerós a Carcassona per lo segond còup, per una lei « quadre », per un contengut au desfolopament de l’occitan e dei lengas de França. Sensa aquò serà una rega de mai dins la Constitucion e ren de mai. Aquesta rega l’avèm auguda après 30 ans de revendicacions a l’IEO (embé d’autres de segur), aüra li cau donar de sens, un contengut, per que vive l’occitan e sigue pas una lenga mòrta dins vint ans. A Besièrs avèm vist de joves per carriera, d’escolans de l’escola publica e dei calandretas. Es per elu que si devèm finda d’èstre presents, per aquesta joinessa d’òc que mete esper en l’avenir de la lenga.

Per acabar dirai que toti li demandas exprimadi per l’IEO dins lo domani de l’ensenhament, la creacion, lu mèdias e la vida publica an per tòca de crear un contèxto favorable a la recuperacion de la lenga, au restabliment de la transmission familiala e au desfolopament dau biais de viure portat per la curtura e la lenga occitani. Aprofiti per saludar la creacion de « Radio Nissa Pantai » dau CCOc-País Nissart, tota en lenga que si pòu escotar sus lo malhum quau que sigue lo luec dont siatz.

La nòstra accion a per amira la preservacion de la diversitat culturala e lingüistica e demanda lo respècte dei drechs de la lenga occitana.

Vos demandi de votar per aquest rapòrt d’activitats e aquest rapòrt morau.

Grassa lo 17 de genoier dau 2009

Joan-Pèire BAQUIE President sortent de l’IEO-06

Après lo vòte dau rapòrt d’activitats e dau rapòrt morau la paraula es estada donada a Maurici CASCIANI que presentèt lo bilanç financier de l’associacion que siguèt votat a l’unanimitat.

Paraula es estada donada tanben ai rapresentants dei associacions afrairadi presenti que vòlion nos assabentar de la vida de la sieu associacion : l’Escomessa (Jòrgi FETTUCIARI), lo CCOc (Cristòu DAURORE), Sota l’òrme (Joan-Pèire SPIES), Bolega-Bolega (Choaseta GENTI), d’Aquí d’Aià (Mauris SGARAVIZZI), e a d’unu sòcis coma Marcèu MANCINI, Evelina MAIOLINO que parlèron dau viatge dau 24/10 a Carcassona(1), Carlòta RUBINI dei malhetas, Gilbèrt COMBE dau teatre….)

L’AG s’acabèt per lo gòto de l’amistat e per d’autres escambis mai individualizats.