Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, li a mai de dotze ans, lo 8 de junh de 1997. Òsca !
Chronique pour ce samedi 22 mai 2010 en lenga nòsta.
Lo Jorn dau Treule
Per l’Agachaire
Ara qu’enfin lo temps de mai comença de semblar maienc (èra puei temps, bota !…), vaquí que la Republica nos convida encuei a festejar lo treule. E aquò s’encapa ben tres còps : aqueu jorn tomba un Tridí, autrament dich lo tresenc jorn de la Decada , e lo treule a, normalament, tres fuelhas. Lo mes es aqueu de Prairial e aquela planta es des promierei de tot prat, prada ò pradariá. E encara de per sa color, que son verd es un simbèu de l’esperança.
Coma sovent ambé lo nombre tres, aquela planta de tres fuelhas simbolisa la fertilitat, e les Irlandés n’an fach un simbèu nacionau, que rapèla una autra de sei simbolicas. Quand au sègle V sant Patric evangeliset son païs, per explicar a son rèi (ò au pòble segon lei versions de la legenda) lo mistèri de la Trinitat (que, ma fista, i aviá pas besonh d’èstre Irlandés per lo trobar pron complicat), se servet per aquò d’un treule : – Vesètz ben qu’es una sola planta, emai aguèsse tres fuelhas !…
Ara de còps de i a, n’a pasmens quatre de fuelhas… Mai d’aquò sant Patric ne’n diguet ren, e fai lòngtemps que de trobar un treule de quatre fuelhas adutz la bòna fortuna e lo bonur. Fin finala, un còp de tres, un còp de quatre : a cadun sei mistèris…