L’associacion de la Calandreta de Drap, nen fa saupre que lo cercaire Laurenç REVEST, vendrà a Drap lo dijòus 9 de Junh, a 6 oras 30 dau vespre, sala Maurice Thorez, per parlar dau film Malatèrra de Philippe CARRESE.
Aqueu film en Provençau, d’una durada de 95 minutas, foguèt presentat per lo premier còup a la television lo 31 de decembre 2003 a 23 oras 05 ; una ora dont lo monde es mai acostumat a faire fèsta emb’ai amics puslèu que de regarjar la television. Maugrat aquò, l’audiança de França 3 qu’es de 4 ponchs per aqueu jorn de l’annada, despassèt rapidament lu 8 ponchs e que per la direccion de l’antena que cresia pas tròup en aqueu film, es una granda reüssida. Per cen qu’es dau cost de l’operacion es de l’òrdre de 450000 € (3 milhions de Francs) es a dire tres a quatre còups pus bòn pacti que lo mendre telefilm en francés.
Lo tornatge dau film si faguèt en gaire de temps gràcia a d’actors professionaus e amators que conoission ben la lenga e que comptavan pas lo sieu temps. Philippe CARRESE, que rescontrèri m’emparèt qu’en temps normau lo monde dau cinemà son contents se, dins una jornada de tornatge, arriban a metre 3 minutas eficaci en la « boita » ; aquí son 8 a 10 minutas que faion cada jorn cen qu’a permes d’acabar lo film en gaire de temps dins lo budget previst.
Maugrat lo succès rescontrat, la direccion regionala de França 3 a pas encara respondut positivament ai propòstas nòvi dau realisator e es França 3 Còrsica que li a fach confiança per un telefilm trilenga aquí (corso, italian, francés) que si debana en Còrsica dau temps de la segonda guèrra mondiala.
– Actors : Estelle Pessemesse, Franck d’Aloiso, Léa Coulanges, Laurenç Revest, Roger Pasturel, Claire Massoubre.
– Realisator : Philippe Carrese.
– Durada : 95 minutas
L’istòria :
Dau temps de la guèrra de 14-18, dins un vilatjon de Provença Auta, una familha que viu en autarcia, e de cu l’univèrs e compauat esquasi tot de fremas despi que lu òmes son partits a la guèrra, manten la rumor d’una malediccion l’entorn de Malatèrra, un vilatge abandonat e « trevat ».
L’arribada d’un manja-garris, balord e mud farà créisser li garolhas en la familha, e lo segret de Malatèrra serà fins finala descubert…
Lo CD de Malatèrra qu’es pareissut si pòu crompar dapertot.
