Amics occitans, la cronica Ribon-Ribanha d’ancuei titrada « Viatge a Barcelona. » v’es prepauada da Joan-Pèire BAQUIÉ, president de l’IEO-06. Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc ! »
Viatge a Barcelona.
Barcelona es una vila que bolega, tala un brusc zozoneant un jorn de mai quora l’issam pilha lo sieu vòl. Dapertot veètz de monde que si desplaçan : de joves en banda, de vielhs per cobla que semblan un pauc perduts au mitan, de toristas per carris entiers, de gents que travalhan, d’autres que regarjan. La vila sembla en ebulicion perpertuala tant en lo centre ciutat coma dins lu luecs toristics taus lo parc Güell ò la Sagrada Familia.
Lo mielhs per visitar la vila es d’arribar despí l’areopòrt « El Prat » sus la plaça de Catalonha, a doi pas de la Rambla, avenguda de 1,7 quilomètre totplen trevada tant de jorn coma de nuech. Aquí s’atròva lo mercat cubèrt de la Boqueria qu’es pròpi da veire, lo teatre dau Licèu que sierve d’operà per la ciutat, un grand masaguin « El Corte Inglés ».
Per li carrieras avesinanti anerètz en lo quartier dau Barri Gotic, fins a la catedrala dont lo dissabta au sera lu catalans joves e vielhs si donan apontament per balar la sardana.
Farètz tirar fins au mercat Santa Caterina dont si pòu manjar dins un luec aculhent, tapàs e especialitats locali (Cuines de Santa Caterina). Demandatz lo sieu vin blanc sec e suau, es un vin que fa cantar la lenga. Après vos convidi a vos perdre en li carrieras que vos meneràn a la plaça Reial dont lu filatelistas si donan apontament lo diménegue de matin, a la basilica Santa Maria del Pí emb’ai sieu doi placetas simpatiqui. Levatz la tèsta, l’i es sempre quauqua ren d’interessant da regarjar.
S’avètz basta doi-tres jorns per l’i estaire vos prepaui de visitar cen que si pòu sonar lu « incontornables ». Lo palais Guell (palau Güell en Catalan) bastit da l’arquitecto Gaudi en lo 1888. Es una meravilha despí li escuderias en sota-sòl fins au cubèrt que si visita emb’ai sieu chaminèias en mosaïcas originali.
Per d’unu lu barcons semblan a de morcèus de crani embé de duberturas per lu uelhs e lo nas, per d’autres a de màsqueras veniciani. La façada es compauada d’una mosaïca de ceramica e de vitreria que sembla bolegar emb’ai rais dau soleu.
D’autri maions si pòdon visitar encara coma la Casa Milà sonada la Pedrera (la carriera de pèiras).
La Sagrada Família, ò sia lo Temple Expiatori de la Sagrada Família dau sieu nom complet en catalan es tanben l’òbra de l’arquitecto Antòni Gaudi. Es un bastiment que recampa mai ò mens tres milions de personas cada an. Aquesta catedrala, consacrada en lo 2010 per lo papa Beneset lo setzenc, es encara en chantier per 20 a 30 ans encara. Es un monument incontornable de Barcelona e doncas da pas mancar.
lo 20 d’abriu dau 2012.
Joan-Pèire BAQUIÉ
Fòtos : Regina BAQUIÉ