Volontariat per l’occitan a Niça
Per aquelu que conoisson pas’ncara lo projèct lo vos cuenti en quauqui rega. Es l’Institut d’Estudis Occitans au nivèu federal qu’organiza l’eveniment « Volontariat per l’occitan ». A per tòca la mesa en relacion d’un « volontari » es a dire una persona que mestreja l’occitan correntament, embé un “aprenent” es a dire quauqu’un que saup li basas de l’occitan e que vòu pilhar d’assegurança. L’amira es de far si retrobar aprenents e volontaris una ora la setmana dins un luec precís, dètz setmanas de seguida.
Vequí doncas per lo projèct.
Doi ans fa, en lo 2011, avia permés a Marc Waltzer, sòci de l’IEO-06 e « aprenent », de si perfeccionar en lenga e de durbir l’an d’après lo cors lenga de Còntes que fa miranda en la valada de Palhon.
Aquest an, si rescontram Coleta Demirtjian e ieu cada dimarç per parlar coïna (cosina). Aquest domani nos interessa totai doi e siam a discutre de la receta mentonasca dei binhetas sucradi de cogorda, dei limaças a la niçarda ò de l’estocaficada. A pauc a pauc, li lengas si desligan, lu automatismos revenon e la lenga endeven naturala.
De parlar manjuca nos fa venir l’aigueta e mancam pas de manjar nautres tanben. Cu aduse un pan-banhat ben onch d’òli, cu fa tastar la trocha ai aspergos, cu regala un pastisson. Brefle fèm camin ensems e Coleta si pensi ja de venir aprefondir lo subjèct ai Rescòntres Occitans en Provença se tot va ben.
La setmana venenta parlerem totjorn coïna, mas bessai coïna dau monde. Parlar de coïna vòu pas dire s’embarrar dins la nòstra e de non regarjar cen que manjan lu autres en la sieu cultura.
Desiri en toi lu volontaris per l’occitan e ai autres, una bòna setmana, e vos convidi mai que mai a parlar occitan.
Coleta Demirdjian e jpb