Venem de recevre de Pèire COSTA, president de l’Associacion Occitana de Fotbòl (A.O.F.) una demanda d’estac (ligam, liame) emb’au site sieu, cen que fem volontier vist que despí lo principi, l’ieo-06 n’a ja mes un emb’au site de OGCN.net que ten una rubrica niçarda :
http://www.ogcn.net/ogcnice/rubrique99.html
Presentacion de l’AOF :
« Nascuda en 2004 de la volontat de federar las diferentas iniciativas en favor de l’identitat occitana a travèrs lo fotbòl, l’Associacion Occitana de Fotbòl (A.O.F) recampa de fotbalaires occitanofònas dels quatre caires d’Occitània.
La practica del fotbòl amb l’A.O.F es duberta a totas las personas (òmes e femnas) esportivas, sapiant jogar al fotbòl e parlant l’occitan (valent a dire en alvernhat, gavòt, gascon, lemosin, lengadocian, provençal). L’A.O.F encoraja la formacion en occitan de los que mestrejan pas encara l’occitan.
L’A.O.F es una associacion lei 1901 independenta e laica. L’A.O.F es duberta a totes los que vòlon obrar al manten e al desvolopament de la lenga occitana.
Non es restacada ni a la Federacion Francesa, Italiana, Espanhòla de Fotbòl ò a quina autra organizacion pan occitana que siá.
Dins sas partidas de fotbòl, l’A.O.F se referís a las reglas del fotbòl, talas coma son fixadas per la FIFA. »
Vequí adonc l’URL de A.O.F. : http://www.a-o-f.org/ per toi lu afogats de balon redon.