Acampada Generala de l’IEO Provença-Aups-Còsta d’Azur
L’Acampada Generala de l’IEO Provença-Aups-Còsta d’Azur s’es debanada aquest an, lo dissabta 15 de novembre, dins Var au Vau dins la sala dau Vielh Molin d’Òli (Defici).
Cau dire que siam ja estats reçuts dins aquesta comuna per un acamp que recampavan 21 professors e animators de lenga ( veire lo nòstre article http://ieo06.free.fr/spip.php?article1184). Au Vau, la comuna que fa mòstra dau sieu estacament a la cultura occitana-provençala, faguèt metre de panèus bilingues ai entradas e sortidas de la comuna.
Le Val – Lo Vau
Lo matin foguèt consacrat a un acamp de Burèu fruchós dont si parlèt dei grani linhas de la nòstra politica culturala avenidoira.
L’après-dinnar l’A.G. permetèt de presentar ai sòcis, orientacions, rapòrt d’activitats, rapòrt financier e projèctes per lo 2009.
AG 2008 au Vau
Vaqui quauqu mòts dau president Pèire BRECHET per aquelu que li posquèron pas venir :
« Despuei Carcassona 2005 e Besièrs 2007, avèm ganhat en credibilitat e en legitimitat… ais uelhs dau monde mai ai nòstres tanben que se siam avisats qu’eriam pas quatre associatius… a se batre per de parpèlas d’agaça, solets dins nòstre canton … avèm demostrat lo dinamisme dau moviment occitan, que siam una fòrça de pression, que i a una demanda sociala, que i a una generacion que monta…
Avèm fach cambiar lo regard dau monde sus lei lengas regionalas… avèm capitat de mòure lo debat parlamentari, de tocar la premsa nacionala d’aquelei causas, e obtengut una reconoissença constitucionala… levat que nos embarrèsse dins un cafochi es pasmens una victòria simbolica importanta… a nautrei de demorar desenant vigilants per l’espelida dau tèxte de lèi…
L’IEO ambé de mai en mai de dinamisme s’es prepausat per objectiu d’estructurar de mai en mai l’accion dins tot l’espaci occitan.
S’agís de respòndre aquí a doas necessitats :
– tornar afortir lei conoissenças e la recèrca
– articular la recèrca patrimoniala, lei competéncias tecnicas e leis accions de socializacion de la lenga.
Çò que nos vau lei grands projèctes quadres endraiats mai que demòran de complir.
L’interès dau quadre es que se l’i pòu participar tant individualament coma collectivament, en locau coma en regionau e en partenariat. Cadun l’i a sa plaça, lo trabalh realisat es valorizat e permete la comunicacion publica.
Nautrei en Provença-Aups-Còsta d’Azur, caminam tanben sus aquesta draia d’estructuracion de l’organisme e lo rapòrt d’activitats se ne’n vòu la concretisacion… »
AG 2008 au Vau (2)
Lo burèu novèu es compauat de :
President : Pèire BRECHET
Vicis- presidents : Joan-Pèire BAQUIE, Andrieu SAISSI
Segretairitz : Anna-Maria POGGIO
Clavaire : Joan SAUBREMENT
Clavaire-Ajonch : Bernard MOULIN
