Per aquelu que lo sabon pancara la calandreta es un aucèu, mas es finda una escòla bilinga francés-niçard creada da una mànega d’apassionats de l’ensenhament e de la lenga.
Despí tres ans an creat una escòla materna a Drap que recampa 18 pichoi de tres a cinq ans. D’aquesti escòlas n’existon 40 sus lo domani occitan e li a meme un colège. Avèm vorgut ancuei donar la paraula a la sieu presidenta Anna-Maria que nen dona de nòvas d’aquesta escòla bilinga imersiva, maleroament la soleta dins lo 06. Podetz contactar la calandreta sus lo sieu site (veire lu liames emb’ai associacions amigui)
Ben lo bònjorn en toi !
Siam ja au mes de decembre e l’annada 2004 es passada coma un lamp !…
La calandreta a fach bèla florida vist qu’avèm despí setembre 18 pichoi, que siam en carga de li emparar la nòstra bèla lenga ! La classa si debana ben embé la sieu magistressa Florença e la sieu ajuda mairala Roselina.
La « nòstra » directritz Carlòta es de segur totjorn aquí quora n’an d’a besonh, e en lo fra-temps, tant es coratjóa que retorna a la facultat dei letras per aprefondir la sieu conoissença de l’occitan, embé lu joves de la sieu generacion !… E de còups que l’i a, passa meme a la television, la nòstra Carlòta, qu’avèm poscut admirar lo sieu retrach diménegue passat en l’emission « Vaquí » sus lo tema : « Cen qu’es lo país ? » Compliments !
Lo mai jove de la chorma, Cristòu, a reüssit la sieu licénçia d’occitan, e a començat la sieu formacion a Besiers, au centre « Aprene », per venir magistre eu tanben ! L’escomessa es bèla, e ten totplen d’energia ; li sovetam un’annada rica e fruchosa !
Autra caua : en fin d’annada civila, pensatz de faire lo vòstre pichin – ò gròs !- regal a la Calandreta de Drap, que serà levat dei vòstres impòsts de l’an 2004, que n’avèm pròpi d’a besonh, e que comptam sus la vòstra ajuda !
Bòni festas de Calènas au nom de toi, « a l’an que ven e se li siam pas mai que li siguèm pas mens ! »
Anna-Maria
