En lo 2008 li es augut la caminada de 1340 quilomètres dei amics de la Chambra d’òc partits de Dronier en li valadas d’Itàlia fins a Vielha en Val d’Aran. En lo 2009 li seràn totplen de pichini caminadas per sostenir l’inscripcion de la lenga d’òc dins la lista UNESCO Patrimòni Immaterial a risc d‘extincion / Urgenta sauvagarda e per renforçar la manifestacion dau 24 d’octòbre dau 2009 a Carcassona « Anem Òc! per la lenga occitana ». Vequí lo projèct que nos es prepauat :
Caminem per Òc
« Chaminem per Òc » es un projèct en ret que la Chambra d’òc n’auguèt l’idea.
Chaminem per Òc si prepaua de metre en ret, dei Valadas Occitani d’Itàlia a l’Occitania granda e la Val d’Aran en Catalonha, de caminadas per faire marcar de la lenga d’òc dins la lista UNESCO Patrimòni Immaterial de l’Umanitat e au sostenh de la manifestacion de Carcassona « Anem Òc! Per la lenga occitana ».
Per aquò faire, la Chambra d’òc a perpensat una marca de qualitat e de ret per l’iniciativa sonada « CHAMINEM PER ÒC!, prepausada dins li grafias clàssica e mistralenca e dins li versions pan-occitani mai comuni de « Chaminem per òc! » e « Caminem per òc! ». La marca pòu èstre descargada directament da internet. (clicar aquí )
Coma si debana l’iniciativa ? Dau 1 d’abriu au 23 d’otòbre dau 2009 li Associacions, li Comunas, li Associacions de Comunas, lu Oficis dau Torisme, lu Parcs, lu Ecomusèus, lu Departiments, li Regions e toi aquelu que n’an l’envueia pòdon prepauar una iniciativa de caminada d’una ò mai jornadas que digue lo jorn, lo luec e l’ora de partença embé una pichòta descripcion dau percors e mai li referenças de l’associacion ò de la persona responsabla.
La Chambra d’òc pilha l’engatjament a coordonar l’iniciativa en publicant lo calendier complet dei propòstas dei caminadas que seràn comunicadi denant dau 15 de mars dau 2009.
Li entitats qu’aderisson a la ret s’engatjan a metre la marca de ret dins la publicitat de la sieu iniciativa e a far conéisser au public lo mai larg e ai mass media li amiras que son prepauadi.
Toi aquelu qu’an aderit a la ret « Chaminem per òc! » s’engatjan a refletre sus una iniciativa comuna que rende visibla a Carcassona la ret que s’es creada e li iniciativas que son estadi realizadi.
L’IEO-06 si prepaua en seguida d’aquesta iniciativa, d’organizar una ò mai de caminadas per òc. Si parlerà d’aquest subjèct a l’A.G. de Grassa lo 17 de genoier dau 2009. D’aquí en là vos demandam de l’i pensar per nos faire de propòstas.
Un exemple :
LAS VALADAS OCCITANAS A PÈ :
dal 14 de junh 2009 un mes de viatge da Oliveta Sant Michèl a Ensilha
Traversar las Valadas Occitanas a pè, sus lhi sentiers GTA e lhi viòls ancians traçats da nòstri reires, descurbir un territòri embe sa lenga sa cultura occitana, chaminar embe d’amís venguts a sostenir l’iniciativa, rescurbir la Convivéncia, lo plaser de passar ensem una jornaa en devisant sensa pressa, far ressonar dins l’aire linde de nòstras montanhas lo sòn de la lenga occitana; portar la bandiera sus lo Vísol, rescontrar la gent, las associacions, lhi ents institucionals per passar ensem un moment de fèsta e explicar las miras de l’iniciativa. En fin finala jónher las Valadas al percors de l’Occitània a Pè que da Vinai arriba a Vielha en 63 tapas de chamin; lançar l’iniciativa de ret interregionala occitana CHAMINEM PER ÒC.
