Diménegue 13 de junh, l’IEO-06 va prolongar un dei sieus camins de la lenga d’òc embé lo tròç de l’Engarvin-Ròcasparviera situat sus la comuna de Duranús. Per memòria l’an passat aviavam participat ai caminadas d’Auriveta Sant Miquèl- Rocchetta Nervina, Gòrb, Plan de Linea-La Parra (Coarasa) en ligason embé la Chambra d’Òc e li Comunas de Coarasa e Gòrb.
Lo cònsol de Duranús es favorable au projèct. Per materializar lo camin de placas seràn messi coma aquela que presentam çai-sota :
Camin de la lenga d’òc : Coarasa (06)
Vos demandam de reservar aquesta data e de vos marcar en bas d’article ò en lu diferents ataliers de l’IEO-06.
Aquesta caminada l’avèm provada, Marc, Celina e ieu. Doi oras de puada per arribar au luec mitic de Ròcasparviera e la capèla Sant Miquèu. Presenta pas gaire de dificultat per una persona acostumada a caminar.
Lo masatge de la Parra vist de l’Engarvin (700m d’autessa)
Lo camin es larg de l’Engarvin fins au Còl Sant Miquèu dont si pòu aver una vista sus la valada de’n Vesubia (1 ora e mieja).
Camin que pua devèrs lo Còl Sant Miquèu
Dau Còl Sant-Miquèu fins a la capèla dau meme nom, la draia si fa pus pichina… (miej’ora)
Lo còl Sant Miquèu 970 mètres d’autessa
…per arribar ai roïnas de Ròcasparviera.
Li roïnas de Ròcasparviera
Per lo luec d’apontament, li reglas de securitat, eca… vos en direm un pauc mai d’aqui gaire.
L’apontament si farà a 8 oras 45 dau matin. Mangerem d’amont toi ensems.
