Diménegue 20 de setembre eravam un trentenau de sòcis a « Caminar per òc », per faire marcar la lenga d’òc au patrimòni mondial de l’umanitat per l’UNESCO. Inés CAVALCANTI responsabla de la Chambra d’òc, una dei organizatritz d’aquest projèct avia fach lo desplaçament despi Draonier (Valada occitana d’Itàlia) per portar sosten ai caminaires. Tra lu caminaires l’i èran la cònsola de Coarasa, Dòna Mònica GIRAUD-LAZZARI e quatre ajonchs e conselhiers municipals de la comuna.
Eran venguts tanben, lo president d’Alp’Harmonia Ricard LAZZARI e lo Clavaire de Sota Òrme Joan-Pèire SPIES, doi associacions afrairadi a l’IEO-06.
Aremerciam toi aquelu que pilhèron part en aquesta caminada e tanben la Comuna de Coarasa que s’es pròpi investida dins l’organizacion.
Caminem per òc : Plan de Linea-La Parra a Coarasa
Lo monde s’endraièt a Plan de Linea, a 9 oras 30 après lu discors de benvenguda en francés e occitan dau president de l’IEO-06, d’Inés Cavalcanti e de Mònica GIRAUD-LAZZARI.
Caminem per òc : Plan de Linea-La Parra a Coarasa 2
La pausa de la premiera dei 6 placas en castanhier que materializan lo camin siguèt aculhida emb’entosiasme per lo monde que piquèron dei mans quora siguèt messa en plaça.
Doi joves caminèron sempre en tèsta : Julieta e Edouard, lu avèm fotografiat a la Baissa de la Crotz.
Arrivats a la Para siguèriam aculhits da Sami e la sieu frema, lo forn èra caud e Robèrt nen faguèt lo plasir de nos faire la sòca.
Lo past a La Parra
Joan-Pèire e Robèrt davant lo forn
Un desplegant explicatiu de la caminada serà alestit d’aquí gaire da l’IEO-06 per lu caminaires a venir. S’atroverà a la Comuna e au Sindicat d’Iniciativas de Coarasa.
