Dissabta passat, si debanava a Vença la 32ena Fèsta de la música tradicionala, dicha Fèsta de la Cònca. Aquela manifestacion es organizada cada an per lo Cepon, au Parc de la Cònca, tra concerts, balètis, presentacion d’instruments tradicionaus, pan-banhat, rires e convivialitat. Esto còup, lo programa musicau èra totplen de qualitat embé, tra autres, lo còro polifonico de Piada Desliura, l’excellenta Banditaliana de Riccardo Tesi e, sobretot, la chorma niçarda fenomenala dau Camin de Vida. Unica ombra au tablèu : Maurís mancava a l’apontament.
Car Maurís
Car Maurís,
Esto sera eravam a la fèsta de la Cònca a Vença, per fin de sostenir lu companhs dau tieu Camin de vida, toi un chícol orfanèus sensa de tu. Faguèron miranda dau bòn, ti juri, l’emocion èra fòrta e l’interpretacion que porgèron de “Paisan dau Var”, “Cauria que vos diguèssi” ò dei “Lops” donava la chicha de galina pròpi.
Coma per encant, sentiavam la tieu presença frairala e generoa d’en pertot a l’entorn, m’aqueu soguinhe resplendissent de bontat e la tieu votz tremolanta tant particulara que da sempre nen chavira lo còr. Eres tot lo temps mé nautres, en lu nòstres esperits, lu nòstres pensiers, tra li ramas illuminadi dei aubres cascalhadi dau vent, en lo garbin laugier finda que, en s’infiltrant dai encoluras, faia refrenir.
Sàs que ti pantaièri l’autra nuech ? Eres bèu, seren, petant de santat e ieu mi chalavi de ti sarrar tra lu braç. Au revelh pasmens, mi sentèri geinada, que ti pòrti ben tròup de respèct e d’admiracion per mi permetre pariera familiaritat. Pura de ben li pensar, li tròvi pus ren de tant estonant ni d’embarrassant aüra. Tu despí totjorn siás l’amic, lo parent, lo fraire mage de cadun de nautres, sòcis IEO e autres niçards de tota mena. Tanben quora ti veèm pas, sabèm que t’atròves gaire luenh, que pilheràs totjorn un moment dau tieu temps da nen dedicar en tota simplicitat e qu’au travèrs dei tieu músicas n’acompanhes de lònga cada jorn dau quotidian.
Car Maurís, siam toi a asperar, dapé de Choasa, de ti veire benlèu e de poder dau viu ti sarrar tra lu braç, torna mai bèu, seren e petant de santat.
Anna-Maria MILARDI (lo dissabta 2 de julhet dau 2011)
Fòtos de Patrick ROUGEOT
Siti de Lo Cepon : Fèsta de la Cònca 2011
Siti de la vila de Vença : Videos