ACAMPADA GENERALA DE 2005
Dissabta 17 de genier dau 2005 a la Còla de Lop
Sala de « La paillère » Carriera J. Laurenti
A 2 oras 30 dau Vespre
L’Estat francés vòu èstre lo pòrtaparaula en Euròpa e dins lo monde de la diversitat lingüistica e culturala.
Pasmens, sus lo territòri francés la situacion legala es catastrofica per toi aquelu que vòlon travalhar en favor de la diversitat lingüistica e particularament per aquelu que vòlon trabalhar en favor de la transmission de l’occitan ai generacions futuri. La transmission de la lenga es menaçada per l’absença d’una política positiva en favor de l’occitan e dau sieu desfolopament.
-L’article 2 de la constitucion tau coma es redigit es una arma contra la lenga occitana (niçard, provençau lengadocian…), dins toi lu domanis
– L’absença d’una legislacion positiva que reconoisse lu drechs de nòstra lenga es contrària ai principis d’egalitat que son aquelu de la Republica. Es contrària ai principis que son aquelu d’una Euròpa « unida dins la diversitat ».
Nautres travalham per la lenga occitana. Volem crear li condicions dau sieu desfolopament, dins lo respècte dei autri lengas e dei autri curturas. Travalham per lo restabliment de la transmission de la lenga.
Per aquò, sus lo territòri dont si parla la lenga occitana, cau crear un environament favorable a l’ensenhament de la lenga e dins la lenga. Cau que lo contèxte legal sigue favorable a la creacion en occitan, a la presença de la lenga dins lu mèdias audiovisuaus e escrichs, a l’emplec de la lenga dins la vida publica e de segur au restabliment de la transmission familiala.
L’ensenhament
L’ensenhament de l’occitan e en occitan deu èstre desfolopat dins quatre direccions :
– l’ensenhament per immersion practicat fins aüra per li escòlas associativi « Calandreta »
– l’ensenhament a paritat orària qu’es practicat e mes en òbra dins lo servici public.
– un ensenhament de sensibilizacion integrat ai oraris normaus.
– lo sosten a la mesa en plaça de cors per lu adultes que vòlon emparar la lenga ò perfeccionar la sieu conoissença.
Lu mèdias
Lu mèdias devon aculhir la lenga de mai d’un biais :
– Per la creacion d’un vertadièr servici public de ràdio e de television en lenga occitana que permetrà dapertot en Occitania de veire e d’escotar de programas dins la lenga de maniera quotidiana.
– per l’ajuda especifica ai operators privats (ràdios associativi, televisions, pressa escricha) que travalheràn en favor de la lenga occitana e de la sieu difusion.
La creacion
L’ensemble de la creacion en occitan dèu beneficiar d’una política de sosten particulara :
– es una politica en favor de l’edicion, dau teatre, de l’espectacle viu en general, dau cinèma e de la mùsica.
– es una accion d’informacion pròcha de la populacion per que pòsque emparar cen qu’es lo patrimòni culturau occitan, que tròup sovent li fuguèt escondut.
La vida publica
La lenga dèu èstre presenta dins la vida publica, dins li relacions tra lu ciutadans e li institucions Aquò vòu dire per exemple :
– Lo respècte de la toponimia e la mesa en plaça d’una senhalizacion bilinga
– L’utilizacion de la lenga dins de documents publicats per li institucions publiqui
– L’encoratjament a l’utilizacion de la lenga dins lu luecs publics, per li collectivitats locali, ò dins li manifestacions publiqui, e pas basta aqueli qu’an un caractèr festiu ò curturau.
Totas li demandas exprimadi dins lo domani de l’ensenhament, la creacion, lu mèdias e la vida publica permetràn de crear un contèxte favorable a la recuperacion de la lenga, au restabliment de la transmission familiala e au desfolopament dau biais de viure portat per la curtura e la lenga occitani. La nòstra accion a per amira la preservacion de la diversitat culturala e lingüistica e demanda lo respècte dei drechs de la lenga occitana.