L’i eravam 25 000, es la chifra oficiala dei organizators de « Anèm Òc ».
Ancuei publicam lo comunicat de premsa de David Grosclaude, president de l’IEO-Nacional embé encara quauqui fòtos dau 24 d’octòbre. N’aprofitam tanben per aremerciar toi lu sòcis e amics de l’IEO-06 que faguèron lo desplaçament embé nautres.
En bas de pàgina lo liame embé l’emission de « France 3 Sud » dau 25/10/2009.
A tots los membres de l’IEO
A totas las associacions que i son ligadas
A tots los qui an participat a la manifestacion de Carcassona
Carcassona lo 24 d’octòbre dau 2009
Mercés a tots per l’extraordinària mobilizacion de Carcassona
La manifestacion de dissabte passat qu’a provat un còp de mei qu’èram capables de méter en plaça ua manifestacion qui ei la pròva que las nostas ideas van plan au delà deus militants associatius.
Qu’ei lo resultat d’un procèssus aviat en 2004 a l’AG de l’IEO de Castras quan estó presa la decision d’organizar ua prumèra manifestacion a Carcassona.
La via de l’unitat deu movement occitanista qu’èra la bona. Qu’avem tribalhat com cau dab los nostes partenaris de Calandreta, Felco, Felibrige et Oc-Bi.
Adara qu’avem lo dever d’utilizar aquera victòria.
Que preneram lèu iniciativas entà har concretas las orientacions anonciadas a la fin de la manifestacion de Carcassona.
Mercés a tots los qui an obrat l’organizacion concreta de la manifestacion, sus plaça a Carcassona e particularament au monde qui son amassats a l’entorn de l’IEO d’Aude e de Alan Roch.
Mercés aus qui, desempuish un an, n’an pas deishat de tribalhar entà aqueth rendetz-vos.
Mercés a tots los qui, en lo lor parçan an organizat un eveniment entà har conéisher la manifestacion e las reivindicacions que i son ligadas.
Mercés aus qui an organizat los desplaçaments en bus o d’ua auta faiçon .
Qu’èram 25 000. Qu’avem pausat reivindicacions legitimas e justas. Los qui desempuish annadas nos contèstan aquera legitimitat que deven adara préner en compte las nostas demandas. Demorem pacifics mes siam mei determinats que jamei.
La manifestacion de Carcassona que desvelha quauques uns deus adversaris a las nostas ideas. Las atacas que son d’autant mei violentas, verbaument, còp que i a insultantas, que començan justament de compréner que la caricatura de las nostas ideas non fonciona pas mei.
Qu’èm ua fòrça qui compta. Deishem parlar los qui n’an pas comprés que lo monde a cambiat e, tranquillament mes determinats, contunhem l’òbra començada
Enqüèra un còp mercés a tots e rendètz-vos lèu per la seguida.
David Grosclaude, president de l’IEO
Carcassona lo 24 d’octòbre dau 2009
Carcassona lo 24 d’octòbre dau 2009 : rescòntre embé Claudi ALRANC
Carcassona lo 24 d’octòbre dau 2009
Carcassona lo 24 d’octòbre dau 2009
Carcassona lo 24 d’octòbre dau 2009 : rescòntre embé SANO Naoko, professor d’occitan au Japon, Universitat de Nagoya
