Resson dei imatges dau Blagaire de l’IEO-06 Jan-Jaume de Niça ven de nen mandar la sieu 12ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Empèga, qu’empegarà !
Son mai que d’un per espichar emé l’interest lo mai viu, leis assais d’empegatge per radobar leis avions britanics emé son tradicionau alcol escosès.
Se la capitada d’aquesteis assais se’n deven validada per lo burèu de l’Organisacion de l’Aviacion Civila Internacionala, totei lei companhias regionalas francesas se metràn sus lei rangs, caduna emé sa blanca : Armanhac per Er Gasconha, Calvados per Er Normandia, Conhac per Er Aquitana Novela, Genciana e Genepi per Er Savoia, Izzara per Er País Basco, Kirch per Er Alsaça, Lambig per Er Bretanha, Marc per Er Borgonha, Mirabèla per Er Lorena, Nèrta per Er Corsega e Raca per Er « Pacalia ensudada » …
Te disi pas come tot aqueu brave monde se troba bolhissent ! Son quauquei milierats d’emplegs novèus a provesir dins lo monde agro-alimentari despuei lei culhidas deis èrbas e dei fruchs fins lei tastages tant nombrós que meticulós de totei lei fiòlas d’aquelei pègas sauvarèlas …
JJ de Niça