Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, aquesta cronica comencèt, li a mai de dètz ans, lo 8 de junh de 1997. Òsca !
Chronique pour ce samedi 22 novembre 2008
en lenga nòsta
Un pròne de Santa-Cecília
Per l’Agachaire
Sabètz que santa Cecília, maridada de fòrça a un pagan dau nom de Valerian, voliá gardar sa virginitat per Dieu. Vos aviáu donat fai dètz ans, per sa fèsta en 1998, un tròç d’un pròne celèbre en lenga d’òc, un pauc embarrassat, que fuguèt copiat per un fidèu, puei editat sota lo mantèu amb aqueu nom : « Sermon prechat a Santa-Cecelha, près de la Bruièira , en 1785, lo jorn de la fèsta d’aquela santa. » Vaquí ne’n aquest an un autre morsèu.
Au moment de la nuech dei nòças, onte son òme es per faire son dever conjugau, la Cecília li ditz que vei un angi pròchi d’eu, qu’es aquí per empachar son prètzfach de se complir. Coma lo Valerian vei rèn, sa frema li ditz qu’ei normau, d’abòrd qu’es pas crestian. Eu, subran, se fai batejar per de dire de veire un pauc aquel angi. Laisso la paraula a l’autor :
« Monsur Valerian n’aguet pas puslèu reçauput lo prumier sacrament de la Glèisa que l’escalha qu’aviá subre los uelhs tombet, e veguet près de santa Cecelha un joine òme polit coma un sol, abilhat d’una rauba blanca, que teniá dins sa man lo pus gròs… Qué creiriatz, vosautras filhas, que teniá a la man aquel joine òme ? Dejà vòstras idèias tròton… Se vos rapelaviatz de çò que vos ai dejà dich, devinariatz que teniá un gròs… sabre, per defendre la virginitat de nòstra santa còntra quiconcas… »