Vaquí la cronica setmanièra de l’Agachaire d’aquest dissabta dins « La Provence », edicion deis Aups.
Per informacion, assenhalam qu’aquesta cronica de « La Provence » a mai de dètz ans. Òsca !
Chronique pour ce samedi 17 mai 2008 en lenga nòsta
S’es passat un 17 de mai
Per l’Agachaire
Siam a Sisteron en 1767. Un òme negre, peu crespat, uelh trevirat, s’espaceja sota les telhs des Cordeliers. A un collèga que lo saluda respònde : « Deman, entendretz parlar de ieu… »
Era lo paire Lalobièra, portier d’este convent, onte l’i aviá dos autrei fraires que podiá pas sentir : lo paire Ferrier e lo paire Tocha.
Lo sera, lo Tocha que veniá de se couchar entende gansalhar la cadaula de la pòrta dau dormidor. S’aubora, e vei una grand lutz e de fum que l’estubassa. Duèrbe la fenèstra e crida secors. Un serviciau accorre, e quand vai per li durbir, l’autre brama : « Siáu mòrt !… » Tocha estaca alòr sei lençòus e s’escapa de l’èstre.
Lo paire Ferrier entre temps s’èra escondut, e lo retrobèron ren qu’un còp l’encendi amorçat.
E Lalobièra ? S’èra embarrat dins son burèu, e fauguet espeçar totei les pòrtas per l’i arribar. Aquí lo trobèron assetat, blessat, ensaunosit, lei braç que penjavon, la tèsta còntra la muralha. Lo cresián mòrt mai coma respirava encar, lo menèron a l’espitau.
L’endeman, qu’èra lo 17 de mai, l’i recebet una visita, e lo sera s’escapet, qu’un mainatgier de Salinhac menet l’assassin en Piemont. Les Cordeliers de Còni lo vouguent pas recebre, se refugiet en Assisa. Quand ailà sachèron ce qu’aviá fach, lo metèron en preson, onte moriguet a l’entorn de 1798.