Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de dètz-e-vuech ans, lo 8 de junh de 1997. Òsca !
Cronicas, dau 20 de març de 2016 en lenga nòsta per l’Agachaire
Vint de març
I a de setmanas onte devo carcular e cercar de temps per trobar lo tèma d’aquesta cronica… Que siegue en rapòrt ambé lo jorn que siam, lo pus sovent ambé la cultura e l’istòria nòsta : sants, provèrbis ò receptas dau jorn, ò data dau calendier revolucionari, anniversaris… E sensa me repetar !
E puei i a de jorns coma encuei, onte sabo pas onte penjar mon lume, de tant qu’ai de matèria. Aquest an, lo 20 de març ei lo promier jorn dau printemps, la fèsta dei Rampaus, lo darrier dau mes de Ventòse (lo calendier republican i celebra la plantadoira). Entre lei desenats de sants e de santas catolics de festejar, n’avèm un d’aicí : sant Nicasi de Dia.
Toquent lei jornadas internacionalas (que i a de jorns que ne’n son sensa), aquest an podrem encuei chausir entre una que degun n’aurà ren còntra : la jornada mondiala dau bonur ; una nos anariá ben : la jornada internacionala dau cònte (una iniciativa suedesa despuei 1991) ; e una que laissarai de caire : la jornada internacionala de la francofonia… Mai es pereu la jornada sensa carn e, per lei gromands, aquela dau macaron…
Adonc, per èstre internacionau encuei, vos prepausariáu de contar a un pichòt un cònte nòste, qu’aquò vos rendrà urós, de pas manjar de carn en signe de dòu per la jornada de la francofonia, e de vos ne’n consolar lo sera ambé d’unei macarons…
Jean Yves ROYER
