Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de dètz-e-nòu ans, lo 8 de junh de 1997. Òsca !
Cronicas, dau 26 de junh de 2016 en lenga nòsta per l’Agachaire
Lo 26 de junh
Cada jorn, ò quasi, se tènon dins lo monde de jornadas internacionalas, mai ò mens conoissudas, mai ò mens seguidas. Lo 26 de junh, ei l’ONU qu’organisa una jornada internacionala de sosten ai victimas de la tortura. Aquela data es estada chausida en referéncia a l’establiment, lo 26 de junh de 1987, de la Convencion còntra la tortura e autres penas e tractaments inumans ò degradants.
De pichòt, nos parlavon ais escòlas de la tortura coma d’una causa d’a passat temps, d’epòcas barbaras que la civilisacion modèrna aviá fach desparèisser. En grandissent me siáu avisat qu’eriam luenh dau còmpte, emai de còps dins nòstes païs…
Mai d’escriure en lenga nòsta a prepaus de tortura, me fai pensar au solet escrivan provençau que n’a parlat, per l’aguer agut vista de ses uelhs quand èra en preson as Ais : ei lo grand poèta de la Renaissença Belaud de la Belaudièra.
Coma vai que, tres còps dins sa vida, eu se retrobet en preson ? Ne’n sabèm ren. Mai nos a contat son empresonament sestian dins un òbra publicada en 1584 amb un títol francés : « Le don-don infernal », allusion a la campana de la preson. Escriu d’un presonier tornent de la tortura « Tant estounat dedintre sa cervello / Qu’un gran de meil ly taparié lou trau »… Faudriá tot citar d’aquela òbra, mai l’edicion de 1595 se pòt legir en linha. Basta de la cercar…
Jean Yves ROYER