Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de dètz-e-nòu ans, lo 8 de junh de 1997. Òsca !
Cronicas, dau 4 de junh de 2017 en lenga nòsta per l’Agachaire
Vint ans
Aquesta cronica aurà vint ans dijòus, d’abòrd que sa parucion comencet lo 8 de junh de 1997, qu’èra un dimenge. Mai puslèu que d’esperar la setmana que vèn per dire qu’èra passat, tant vau de l’anonciar…
M’èra estada demandada per Joan-Pèire Tissier, ara retirat de nòste jornau mai totjorn actiu, mai que mai ambé son « Blues e polar », e lo paure Andrieu-Danís Mousset, tant regretat.
Les tèmas ne’n fuguèron d’intrada pres sus lo calendier, e subretot consacrats a la cultura nòsta dins totei sei dimensions : istòria (locala e regionala), proverbis, legendas, tradicions, cultura, fèstas de tota mena, cosina, sants e santas dau jorn, datas dau calendier republican, anniversaris, emai a l’actualitat quand nos tocava d’un biais ò d’un autre.
A la debuta aquò se fava a quauqua ren pròchi, mai ambé lo temps venguèron sempre d’efemeridas exactas, que lo tèma tombèsse just e just au jorn de la parucion.
Lòngtemps lo format ne’n fuguet cambiadís, quora un pauc pus lòng, quora mai cortet. Mai en 2007 me demandèron de lo redigir desenant dins una forma fixa, que chausiguèro aquela de 1325 signes, espacis comprés. E dètz ans fai que me l’i tèno sensa jamai ne’n metre un de mai, ni que d’un ne’n fague fauta…
Una anecdòta : mandavo alora mon article sus una disqueta que metiáu au carri… Ara basta d’un clic per qu’arribèsse…
Jean-Yves ROYER
