Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e cinq ans, lo 8 de junh de 1997. Òsca !
Cronica dau 23 d’abriu dau 2023 en lenga nòsta per l’Agachaire
Bèstias de circ (7)
Vau acabar aquela tiera circassiana ambé de bèstias qu’auriáu poscut començar per eles, e que degun de ses amators li metrà aqueu nom : les chivaus, que per un cavalier son d’animaus, e de tot segur pas de bèstias !
Pasmens, tre les promiers circs, les chivaus l’i tenián una plaça granda. D’autant qu’eles, aviam pas besonh de les anar querre a l’autre bot dau monde. Li aviá de sègles que li sabiam parlar. Favon partida de la vida de cada jorn, tant en vila coma a la campanha. E per tornar au circ, se les animaus sauvatgis l’i seràn enebits en França tre 2028, les chivaus es evident que son pas dau nombre. Tot lo contrari : avem ara depuei d’annadas de circs soncament equestres donent d’espectacle remirables. Fau n’aguer vist un de Bartabàs per s’avisar que lo rapòrt de l’òme e dau chivau pòt èstre una relacion tant d’afectivitat coma d’intelligéncia.
Avem pereu fòrça circs sensa lo mendre animau ambé de representacions espectaclosas. Coma lei Francés dau circ Pluma ò lo canadian Circ dau Soleu, naissuts totei dos en 1984. Mai lo promier es ara mòrt, e lo segond pena per assajar de reviure. L’avenir dau circ es pas assegurat.
Adonc per ara vau arrestar de ne’n parlar. Mai ai encara tot plen de causas a dire sus lei bèstias e les òmes, en païs d’òc per començar, e sempre mai problematics dins lo monde entier.
Jean Yves ROYER