Resson dei imatges dau Blagaire de l’IEO-06 Jan-Jaume de Niça ven de nen mandar la sieu 34ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Lo blad de Santa Barba …
… o lei ben fachs de l’ecologia financiera !
Prenètz a l’azard, Bautesar, un canton parisenc, en riba de Seina, monte se fasiá lo negòci de vin. Despuei que la cinquena filha de Mariana l’occitana s’auborèt, faguètz i defilar mai que d’un centenau de ministres e secretaris d’estat. Deis anonimes fins lei mai fabulós, que seigue emé d’ancians francs (venguts un momenton centimes) ò emé d’euròs, totei tras que scrupolós, an velhat, velhan sus la santat fragila de la cachamalha dau país.
Dins lei mitans ben assabentats se murmura, seguissent lei lusents conselhs venguts d’en ribas de la mediterranèa, qu’en plaça de levar d’impòst novèu, lei nòstrei financiers de l’ENA, van assajar de faire levar de blad … e qu’es demandat a monsur « lotò-dau-patrimòni » (1) de faire la chausida entre l’òrt nantés, lo jardinet dau manoir de Beaucé, l’ipodròm de Compienha e la teulissa de deman (2) de l’ostalet nafrat de l’archivesque de París, per i faire la promiera semenalha (3).
Espèra qu’esperarà, cu saup … de còp que i a …
(1) totei lei niçards de soca coma de còr, crestians coma mecresents, i demandaràn, oblidant Santa Barba, qu’aquest blad ne’n devenguèsse aqueu d’Eynaudi (4) …
(2) se trobarà ansin, au còr de la capitala, aliança de l’ecologia e de la finança, una teulissa que si dítz verda … sensa crenta de cremar a la mendre aureta primadiera !
(3) son encara a chifrar, leis enasiens responsables d’aquest projèct, sus lo biais de contrarotlar, en fin de jornada, lei sacas dei semenaires ai pòchas corduradas …
(4) vos siatz avisats coma semblan dei quartons de luna aquestei polidei pecetas …
PS 1: coma siam dins una urgència que li dison absoluta, se malurosament la Santa Barba es estat ja festada, semenaràn lei grans lo promier d’abrieu venent …
PS 2 : son servadas quauquei figas per pagar, a prètzfach, lei segaires de deman …
JJ de Niça