Resson dei imatges dau Blagaire de l’IEO-06 Jan-Jaume de Niça ven de nen mandar la sieu 53ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Viva l’OM
Venètz pas mi parlar dei marselhés !
D’avans meme que lo Brunon, lo reinet novèu, nisat gaire de temps fa, a l’ostau de la Pacaliá, nos aguèsse, e merda, toteis ensudats, emé l’ajada d’un certan Molinari vengut de La Ciutat, s’èra dich, qu’aquelei rèire, rèire … rèire-felens de Protis, avian tapat lo pòrt vielh emé una mistolina sartineta.
Alora, quora a la seguida dau mandadís de dos malerós pichons petards, lo 14 de julhet, sus lo campàs dau Velodròme, per festejar la soleta papinada dau « goleador » vengut de Grécia, leis Fanatics e leis Ultras, afogats de l’Olimpic de Marselha, fuguèron empachats de tornar a l’estadi, per protestar d’aquela fèra injustícia, s’en anèron totei banhar sus leis plajas dau Gaston ( lo tipe que durmiá emé lo sieu capèu e Edmonda ) monte despleguèron sa servieta.
Vendràn plus nos faire creire aquelei chormas de galapians, qu’a cada partida, serián de milierats (*) per lei faire bolegar, lei bandièras gigantas ai colors dau club … ò fant … aquí ne’n pòdem comptar que cinc … de gusàs.
Farcejaires !
(*) E siam pas aquí per abordar lo tant espinós problèma dau comptage dei manifestants. Auràm totjorn, sustot aquí encò de Marselha, que lei chifras siguèsson arabes o romans, lei 45 pernodiens de la poliçà e lei 51 ricardiens dei sindicats reünits …
JJ de Niça