Resson dei imatges dau Blagaire de l’IEO-06 Jan-Jaume de Niça ven de nen mandar la sieu 66ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
L’entraïnament de Barba Calènas
Dins aquetei temps d’espandiment de la climatisacion, dei pompas de calor e autrei Ventilacions Mecanicas Contrarotladas e d’esvaliment deis autei chaminèias ben ensujadas, en fòra la despareguda dei pichins savoiards, lei nòstrei cosins d’a passat temps, lo bèu mestier sasonier de Barba Calènas ( estampilhat nòrma ISOLA 2020 ) s’en deven de mai en mai malaisat per lo practicar.
Lo BABaCar ( Brevet d’Aptitud per Barba Calènar ) es vengut estrictament obligatori per la chormalha de clònes, escamplilhats tre lei pòts de crisantèmas de la Totsants sarrats, dins totei lei galariás mercandas, ostaus de l’atge quatren, escòlas mairalas e elementaris, sensa oblidar lei comitats d’entrepresas e totei lei collectivitas territorialas ensudadas …
Pasmens lei savis brusselós – estrasborgés (1) son totjorn a chifrar : la franca libertat de barutlar estent la règla e lo carreg emé de rènas estent vertadièrament ecologic, emé lo sieu BABaCar, lo bònòme dau nòstre podrà ò podrà pas, faire concurrència ai Befana, Gèsu Bambino, Paire Novè, Sant Basili, Santa Lucia, Sant Micolau e autrei Reis ( lei vertadiers, pas aquelei de la fava ) per distribuir tot lo fuble de presents enribanats dins lei caussetas, esclòps e soliers de l’Euròpa tota ?
Alora, per se tenir lèst per lo cas d’un servici dins lo grand nòrd, Amazòna, la sieuna bòna collèga, engibrèt l’entraïnament de Barba Calènas : lo veisem aquí faire la meridiana a la Ternitat, camin de la Fònt Santa, dins lo frigò de l’anciana fabrica de glaç Natta … Aquest frigò a ren de veire, seiguètz en toteis assegurats, emé l’ostau de l’Aubre Inferior ; lo paure Barba Calèna i partegariá la jaula emé nonanta dau cent d’un autre presonier (2).
1: vos disi pas lo defilat d’influenciaires que veirem dins lei corredors de Brussèlas e d’Estrasborg ( productors d’aranges, cedrats, codonhs, dàtils, gigerinas, pèras, pomas, pistolas, aurelhetas, cachadents, milhàs, panadas, tortons ais pinhons, cachats, calissons, papilhotas … ) quora deuràn se clinar, lei nòstres savis europencs, sus l’armonisacion dei tretze desserts …
2 : son totjorn pas « gaire » subrecargadas lei presons d’en cò nòstre …
JJ de Niça