Resson dei imatges dau Blagaire de l’IEO-06 Jan-Jaume de Niça ven de nen mandar la sieu 25ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Siam perduts !
Paures de nosautres, leis òmes, siam perduts :
– d’escondon, en 1545, lo concili de Trenta donèt au femelam, una ama ;
– aprofichant dau pastís de 1944, De Gaulle, li dònet lo drech de votar ;
– dau temps dei congiets d’estiu de 1965, lo meme grand gusàs, ajudat per aqueu que farà bastir a París, lo museum semblant una usina de bornèus multicolòres, lei laissèt durbir un compte personau dins la banca de sa chausida ;
– alora que, dins l’invèrn 1975, èran toteis a tricotar, Simona Veil, confisquèt leis agulhas e distribuïguèt de pilulas per lei consolar ;
– en 1981, lo pòrta-nieras de Gem, lei convidèt de jogar, sensa crenta, emé sa carta blua ;
– e per festejar lo muguet de 1986, Bouygues li ofriguèt lo barutlant telefonet.
Aviam ges de besonh dau darnier Mac Cormick per mesurar, encuei, coma de lònga, lo pes dei fremas que, urosament, pas jamai s’en podrem passar !
Mai coma esplicar que, tancada aquí darrier, la frema es l’avenir de l’òme ?
JJ de Niça