Resson dei imatges dau Blagaire de l’IEO-06 Jan-Jaume de Niça ven de nen mandar la sieu 59ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Ikea a Nikaïa
Baston de marescau (1) o baston de dinamita (2) aquesta pèça ?
1. baston de marescau per lo geniau Gaston la Cofa qu’a capitat, seguissent un a cha un lei lusents e clars conselhs dei 144 pajas ( de papier reciclat ) de la noticia multilengas, l’assemblatge deis uech pèças de la cabaneta per leis auceus, emé un solet pichin tòrnavitz crucifòrme, una maceta de bòsc e un bòn collèga, dins mens de la miejoreta prevista per va faire …
2. baston de dinamita que, totei lei fins bricolaires, après una bòna setmana de fèras gamachadas, ajudats per tota la chorma dei professionaus dau Gim, lei sieus Leif Erikson e Niklas Hult comprés, recampada per l’eveniment, fòrça enrabiats, botaràn dins aquest fan de carton de bataclan escandinau, per festar l’an novèu chines venent : l’an dau cropatas …
PS 1 : s’èriàn, aqueleis auceus, de bregadiers, gardas republicans reires felens dei pareus de gentei dindoletas ciclistas, lei manifestacions per la subrevida de l’ensenhament de la lenga dau país o contra fèra napoleonisacion dau cai Cassini ( ressòn de l’ensudacion muselierana de la nòstra Pacalia, Ò, la tant aimada* ) vengudas enebidas, seriá pas per nos jogar una pèça de teatre que ne’n farián usença d’aquest baston …
PS 2 : s’èriá un meusson, un saucissòt d’aï, ò un fromatge de cabra mancarián pas lei fins renards per aconselhar lei paures cropatàs !
PS 3 : an fòrça chança, l’Annà e lo Filipe, la soleta filha e l’òme de la vielhariá ai capeus sempre novèus : lei tissus escocés estent fòrça tròp radurats, maugrat totei seis esfòrç, la chorma d’ingeniaires d’Ikea a pas capitat l’adobatge de kilt en kit !
PS 4 : urusament que lei promiers toristas venguts de la doça Focida mediterranéa toquèron, quauquei temps fach, lei Ponchetas ben avans aqueleis escandinaus conglaçats, lei ribas dau Diable ; auriàn jamai poscut cantar, en lenga nòstre, Nikaïa la bèla rebèlla …
* emé la testa dau Sud, mesa au fenestron, assajatz de nos en faire una bèla seringòla !
JJ de Niça