Resson dei imatges dau Blagaire de l’IEO-06 Jan-Jaume de Niça ven de nen mandar la sieu 64ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Dindoletas
E ara qu’an fugit lei gentei dindoletas
Emé lei copavents vèrs de país pus doç … (1)
Après lo retorn au nòstre de l’ors, dau lop e dau voutor (2), aqueu timide de la dindoleta ?
Aurián noms de còdi « mirabèla » e « gratacuòu » … per restar tant agropadas ?
Bolier chinés per comptar leis arribatges de vitz rus novèus ?
Chança per leis aucèus : abandonat l’enterrament dei fieus de carreg d’electricitat ?
Concert, preferit au murmur dau periferic, per lei parisencs tornats per campanhas (3) ?
Costariá mens car l’electricitat en cò de la novèla firma privada « Per Lei Pijons » ?
Despuei l’avaliment dei genovesas de teulissa son vengudas S.F.F ( Sensa Fieu Fixe ) ?
Emé sa derogacion jornadiera, es permesa la caça ai mosquilhons tant aluenchats dau sieu ?
Es inferiora a n’aquela de la nèu, la massa volumica dei dindoletas ?
Esperan totei (4), per lei crompas de premiera necessitat, la dubertura de la maïon Fiol ?
Pantais de caçaire : qunteis apèus de tria per d’estadetas saborosas ?
Pareus de « dindoletas » (5) fòrestieras, renfòrç tant esperats per la municipala niçarda ?
Rescòntre de pilo retorn, Niça – Coni, jogat a l’Òli … portissòus sarrats ?
Segon vos : eficaç l’espaventau, vògut per la comuna, mascat en pauc ?
Seràn autorisats, ben après la Sant Joanet, lei vòls d’Er Passeron ?
Serián de cropatàs, quant de fromagis « Jan de la Fònt » faudriá per lei sadolar totei ?
S’èrián de voutors, quant de temps, Astruc Luc, auriá encara d’obratge ?
Supèrba sifonia musicala composada emé una soleta nota: la blanca-negra !
Urosas lei dindoletas que, dins aquest temps d’isolament, pòdon jogar a quicha-amploas !
1. « Lo Quinçon », un poèma de Rogier Rey ( La Sanha de Mar, 1926-2007 )
2. e toei leis ans se vei florir, au portau deis escòlas, lo panèu : an tornats lei peolhs (6) !
3. per tenir targa a toteis aquelei que vòdrián rendre muts ais, gaus, vacas, cascaveus, relotges e cloquiers, de comitats de sosten a la vida videnta se racampan de tot costats …
4. se garçan pas mau de pas gardar la linha (7) … coma distància minimala de seguretat
5. seràn bessai mai severs que lei gentei pareus de ciclitas, de negre jargats, d’a passat temps, aquestei personaus de renfòrç ?
6. de segur que, despuei l’an pèbre, son estats fonduts ò sarrats lei sieus cinemàs …
7. an pas sachut que despuei 1781 a fagut, la linha, la metre, per lo mètre, ai bordilhas …
JJ de Niça