Resson dei imatges dau Blagaire de l’IEO-06 Jan-Jaume de Niça ven de nen mandar la sieu 28ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Mai, de que fa lo chapacan ?
Emplec a mieg-temps
Dins la lucha contra lo chaumatge, estent que la creacion d’un molon d’emplecs ajudats novèus, leis emplecs joves, leis emplecs « cui-cui » ( contract unic d’insercion de totei menas ), coma sempre dempuei pèbre, maugrat lei sempiternas promessas, a fach chic, lo govern ( e son armada de conselhiers estampilhats Padena* ) e leis emplegaires, reünits en conclau, an decidit de faire portar totei seis esfòrç sus leis emplecs a mieg-temps …. que se pòu veire aquí, una vertadièra capitada, l’un de sei positius efètcs …
S’es pas dich se lo mieg tondeire a trobat un mieg amolaire alucant son entorn d’una mieja dotzena de mieja belugas gisclant d’una mieja mòla eissagada, pauvre Pistachier, d’un solet un mieg litre de piqueta de Bailet …
PS 1: a la seguida dau consèu vengut dau mai aut, passant de l’autra costat de l’avenguda deis Aliscamps s’es pas trobat dins l’armada dei mainatgiers, un solet per logar lo tondeire que poguèsse acabar lo trabalh …
PS 2 : la FIFA es a chifrar, se lo sieu budget mistolin lo permet, per prepausar de jogaires de balon a mieg temps ( un temps sus lo prat, un autre per de reclamas ) … Mai seis esitacions son fòrtas : son pas de segur de trobar d’afogats ( brigadas ò autreis ultras ) dau meme e, d’emplir a demieg leis arenas udolantas, aquò se pòu pas mostrar a la television … monte, soventei-fes, un mieg reportatge ( leis imatges sensa lo comentari ) ne’n agradariá mai que d’un d’aquelei vertadiers esportius au botilhon de cervesa … jamai a demieg !
PS 3 : dins l’esfèra dau poder son mai que d’un a tremolar de crenta que la bolhenta dòna de Pampelone venga cridar la sofrença deis animaus ansin mautractats a demieg …
PS4 : fins qu’a l’ora d’ara, dins la foncion dicha publica, la creacion de poste de mieg perceptor es estada abandonada …
* Padena que ten totjorn lèsta, de còp que la va demandan, una conferéncia sus l’intelligència … concreta, normala ò superiora …
JJ de Niça