Despartida d’Andrieu SAÏSSI.
Venèm d’emparar embé tristum la despartida dau nòstre amic e reire president Andrieu SAÏSSI.
Andrieu siguèt d’annadas de temps un dei cepons màgers de l’IEO-06. Li devèm totplen, es eu que reviscolèt la nòstra seccion Jòrgi GIBELIN e l’endraièt devèrs una reconoissença larga pròche li institucions dei Alps-Marítimes, la comuna de Grassa, aquela de la Còla, d’en Bergier, Sant Vallier e ben d’autri.
Professor d’italian e d’occitan provençau a Grassa au collège CARNOT, balhava de cors per lo còmpte de la nòstra associacion tant a Grassa coma a La Còla de Lop. Lo sieu engatjament lo menava a organizar d’estages lingüistics sus l’ísola Santa Margarida en fàcia de Canas per lu collegians. Tenguèt doi ans de fila (2005/2006) una crònica setmaniera en lenga sus Nice-Matin edicion Grassa « Resson d’Aquí » e permetèt ensinda a mai d’un sòci de l’i escriure. En seguida d’aquesta capitada siguèt publicat lo libre Resson d’Aquí (Ed. Tac Motif des Régions) e lo premier libre editat da l’IEO 06 : Ribon-Ribanha (Crònicas d’ancuei per deman).
Caminada botanica de Sant Vallier 2014
Andrieu transmetèt la lenga a de centenaus d’escolans en lo relarg Grassenc, que siguèsson de collegians coma d’adults, mas la sieu fiertat èra tanben de l’aver transmessa ai sieu filhas Rosamonda e Maria-Laurença e a la sieu felèna Matilda que passèt trovar l’IEO 06 au principi dau mes au festenau dau libre de Moans-Sartòu.
Festenau dau libre 8 d’octòbre dau 2016
Fèsta dei 40 ans de l’IEO-06 lo 25 de novembre dau 2016
En lo 2017 Andrieu participèt emb’una dei sieu filhas e la sieu felèna a la peça de teatre bailejada da Gilbe Combe : Jana la petite maîtresse des marmottes : tres generacions a parlar en lenga sus lo pontin !!! Ver que la sieu presença siguèt una fortuna per la capitada d’aquesta peça.
Andrieu sus lo pontin a Sant Valliers lo 10 de junh dau 2018
Andrieu, siás estat lo nòstre mèstre, lo nòstre amic, lo nòstre companh, aqueu que n’a dubert la draia, sabèm tot cen que ti devèm. Ancuei siás partit en l’estelam, segur que troberàs de personas embé cu parlar occitan.
Presenti au mieu nom e au nom de l’IEO 06 li mieu complanchas adoloradi a la familha tota, la sieu molhèr, li sieu filhas e felènas.
Andrieu serà sepelit aquest divèndres 25 d’octòbre. La ceremonia religioa si debanerà en la glèia de Sant Vallier (06) a 2 oras e mieja dau ‘près-dinnar.
Joan-Pèire BAQUIÉ President onorari lo 20/10/2024.
NOS AN ESCRICH SUS FACEBOOK :
Avant de venir a Niça per lo cors de Bòn Viatge, avii seguit lo sieu cors a Grassa pendant una annada. E de segur l’avii tanben conoissut via lo CA de l’Ieo-06
Complanchas a la sieu familha, amics (e ancians escolans).
- Loïc Gastou
- Quna tristesa de descobrir la despartida d’André. Un òme remirable qu’aviá un impressionant saber! Soi urós d’aver posqut rencontrar aquel afogat d’occitan. Soi fier d’aver posqut escambiar amb André… Malgrat la tristesa e la marrida umor que me ganhan quand legissi aquelas linhas, n’ai pas qu’un mot a dire per André : Mercé.
Pecaire… Encara un òme discret e modèste que se’n vai… e un grand trabalhaire…
Una bèla persona pròpi, nen manquerà totplen 
Finda ieu que rescontreri Matilda a Moans l’autre jorn .
Siáu ben trista d’aprendre quò, un òme tant gent, tant amistós, cultivat, agissent e pasmens discrèt. Presenti ieu tanben mei complanchas a sa familha, a seis amics a totei lei collègas de l’Ieo-06. Mercé a tu, Andrièu!
Un grand valable que s’en va ! Codolenças a la familha
Despartida d’un amic d’una figura de l’occitanisme. Nòstrei complanchas adolentidas a sa familha. Jaumelina e Miquèu
NOS AN ESCRICH PER CORRIEL :
GENTI Françoise : Andrieu : Un òme brave, malicieu… Pròpi una bèla persona, manquerà totplen a totplen de monde.
TAUTIL Gerard : Discrèt e senat, conscient dei dificultats a l’entorn d’una reculturacion occitana, s’es jamai mès de caire Se siam crosats dins les annadas setanta/ uechanta dins lo quadre de « Volèm Viure Al Pais » en Provença. Mei pensadas entristadas a sa familha.
Josette MORANÇAY : En 1993, a pena revenguda a Grassa, cercavi lèu un cors de provençau, la lenga dei mieu grans que compreniáu pas gaire e que ne’n sabiáu pas dire 3 mots.
Per chabença, èra lo moment que Andrieu durbiá son cors a Grassa, lo dimècres de sera, dins l’escola mairala onte la sieu frema, Odette, èra la directritz.
Eriam mai d’un trentenau d’escolans, de nivèus diferents, mai totei afogats d’aprendre aquesta bèla lenga. Andrieu se metèt a nos l’ensenhar ambé fòrça paciéncia ! en meme temps que nos fasiá connoisser la cultura occitana, qu’èra fòrt saberut e pas solament dins aquest domani.
En mai d’aquò, nos entraïnèt a faire de sortidas a tòca culturala, per exemple anar estudiar la flòra dau nòstre relarg qu’aquò l’apassionèt..
Un grand Mercé esmogut a Andrieu que non l’oblidarem.
Mei complanchas a Odette, Rosamonda e Nini.
SAHM06 De Mentan,
Vou mandema e coundouliance atristàie pèr a despartida de noastre coulega Andrieu.
Servema n’a memòria r’acuelh d’Andrieu dame a soua benevoulença, gentilessa e amistà, en soun coulege de Grasse pèr un stage de lenga d’o, i è tant’u anne-fa.
Joan-Louis Caserio
Un coulega de Mentan
MARTRON Frederic : Mossur Saissi ò pusleu mestre Saissi qu’èra per ieu ben mai qu’un colèga.
Un òme grand que marquèt tot son monde per sa cortesia, sa paciencia son gentum. Era un eisemple de militantisme culturau e d’umanitat.
PIETRI Jaume
Un aparaire de tria dau País e de la lenga d’òc nos quita e nos laissa
dins lo tristum. Nos sobra son exemple e tant de remembres!
Disi a sa familha mei complanchas adolentidas. Adieu l’amic.
Laurenç REVEST : C’est avec une immense tristesse que la famille de M. André Saïssi me demande de faire part de son décès, ce matin à 6 heures à l’âge de 85 ans.
Pour la grande majorité des personnes qui l’ont connu, M. Saïssi était un professeur de Provençal et un ami. Il a enseigné au collège Carnot à Grasse dans les années 80 et 90.
Très impliqué dans le sauvetage de cette langue occitane, il avait toujours à cœur de promouvoir cette culture.
Son enseignement a touché des générations d’élèves, éveillant en eux un amour pour notre région et ses traditions. Ses cours étaient bien plus que des leçons, ils nous invitaient à voyager au cœur de cette identité provençale et de notre beau département.
Je me souviens de lui comme d’un professeur d’une extrême gentillesse, ayant toujours le sourire, qui aimait son métier et par dessus tout ses élèves. Bienveillant, il nous encourageait à exprimer nos pensées. Sa sagesse et son dévouement resteront gravés dans ma mémoire.
Vous demeurerez à jamais dans nos cœurs.
Vos mercejam per tot M. Saïssi (nous vous remercions pour tout).
FRUCHIER Bernard :
Me fa fôrça pena.
TOSCANO Reinat :
Una figura màger de l’occitanisme et de l’aparament de la lenga.
Reinat
NOS AN ESCRICH PER WHATSAPP :
Anna-Maria SGARAVIZZI-GARCIA Siam tristes… una figura de l’IEO 06 que s’en va…🙏
Rogier GILLI : Un grand òme, un molon de saber que s’en va. Bòn viatge Andrieu.
Mirelha COMBE-TRINQUET : Aquò mi fa fòrça pena, qu’èra una persona intelligenta e agradiva. Totei meis amistats a sa familha.
Carlòta RUBINI : Veni d’emparar finda ieu la despartida de nostre amic Andrieu Saïssi un sabent de la causa occitana mas sobretot un òme gran, generós, AGRADIU…. Èra totjorn present per vi donar d’ajuda, vi conselhar, èra present de toti li luchas umani… Perdèm un gran amic…. A Nini la sieu filha, e a la sieu familha, mandi un fais de pensadas amistoï… Andrieu, de segur, va anar rajónher Alan, Mauris, Clovis, Crestian B., dins li galaxias e faire ensems ribòta en cantant…. ❤️
Joan-Pèire SPIES : Cars amics,
Ai lo tristum de v’escriure que Nini ven de mi sonar per anonçar la despartida de son paire, nòstre amic Andrieu Saisi, reire president e sòci de l’IEO-06 despí sempre.😥
Un grand merce Jòan-Peire per aquest bèu omenatge que nos pertòca tot plen. Un grand vuedje s’es instalat aquest 20 d’octòbre. Que tristessa de laissar s’en anar lo monde qu’aimant.
Aurevoir cher André, je n’oublierai jamais votre gentillesse, votre savoir ,votre humour. Reposez en paix. Sincères condoléances à vos proches .
Qunt òme gent ! Totjorn lo sorire, la modestia e una lenga ! Gardo dins l’aurilha son biais de dire lei R, amb doçor, coma era.
Era totjorn un plasir de lo rescontrar, solet o en familha. Me soveno deis escòlas d’estiu amb sa familha, vosautras sei dròllas. De l’aguer auvit chantar mai.
L’eissubliarem pas.
Viva en toui,
Acò si qu’es una marrida nova! Andriéu l’ai counouissut, quoura ai coumençat da ensegnà. Eri estat noumat quauqui semana à Carnot en Grassa e es aià que si sian vist e que si parlavan: éu en Prouvençau, iéu en Nissart. Brave ome, touplen à l’escouta e toujou m’una souguigna per nen augurà la benvenguda. Lu nouòstre souvenì soun aquelu de bouòi moument e lu mi gardi en ment embé lu miéu pensié esmougut.
Sus lo jornalet dau 22/10/2024 : https://www.jornalet.com/nova/22602/nos-a-quitat-andrieu-saissi-figura-clau-de-loccitanisme-provencal
Sus Aquò d’Aqui., Andrieu Saissi, l’òme positiu : https://www.aquodaqui.info/Andrieu-Saissi-l-ome-positiu_a2534.html
Andrieu Saissi èra un grand occitanista. Èra un modèl de cortesiá, de qualitat lingüistica, de rigor intellectuala e d’ambicion culturala. Totei lo presaviam fòrça. Venguèt participar au Cafè Provençau, a Ais de Provença, e sa preséncia nos motivèt. Cultivem sa memòria.
Per aqueli e aquelu que non posquèron venir : Siguèt una bèla ceremonia, la glèia èra cómola. L’IEO 06 èra ben present embé lo sieu president JP SPIES, Maurici Casciani, Gilbe Combe, Jaume Pietri, Gilibèrt Mancini, Regina, ieu e ben d’autres. Pilhèron la paraula en occitan JPB, Gilbe e Chabaud. Lo còro « Piada desliura » bailejat da Daniela Franzin cantèt « Si laude Maria » e lo « Se canta ». Un tamborinaire convidèt lo monde a intrar en la glèia. Nini arremercièt lo monde venguts e convidèt aquelu.i que lo volian a anar au cementeri de la Còla de Lop dont s’atròva la tomba de familha.