Festenau « Cantar lo País »
Dins lo quadre dau 16en Festenau « Cantar lo País » , l’atalier de cant dau Gramon èra convidat a venir cantar a Mons per Patric MEYER e la sieu chorma.
Per nautres èra una premiera, un batejar se volètz. Inutil de vos dire que aviavam toi lo tibo-tibo partent de matin de Niça.
A miegjorn, si fermeriam toi a Sant Cesari en cò dei sòcis Valeria, Pèire e Fabian en la sieu « Pita-figa » per l’aperitiu e lo past a l’escotisson. Joan-Pèire AIPERTO, lo nòstre cap de còro nos faguèt cantar e donèt lu sieus darniers conselhs per lu cants e la presentacion.
La tension si sentia encara mai en li veituras sus lo camin que mena de Sant Cesari a Mons passant per Sianha. L’ora s’avesinava de cantar davant un public e ieu lo bèu promier ne’n menavi pas larg.
En la glèia, toi lu gropes de cantaires èran presents per la targa vocala : Article 9, Cap sur la vie, Cardelina, Boulegadis e nautres lu dètz-e-uèch (1) dau Gramon.
Passeriam en segond après Cardelina. Presentèri la nòstra associacion e Joan-Pèire AIPERTO li cinc cançons.
Se lu autres gropes n’an donat una idea de cen que nen sobra encara de travalh per arribar au sieu nivèu, devi dire que si siam pas tròup mau depatolhats per cantar. Li picadas de mans dei espectators e dei autres gropes presents n’an ben ajudats, lo devi confessar.
Avèm descubert a Mons una organizacion remirabla e un vilatge aculhent e risolier.
Se « Cantar lo País » lo nen demanda encara, farem lo possible per l’i tornar. Avèm un an per travalhar e si melhorar. Alora toi lu espers son permés, non ?