Cars sòcis, cars amics,
Ièr, lo 26 de junh, lo president onorari de l’IEO-06 siguèt fach citadin d’onor de la comuna de Coarasa en presença de la conselhiera regionala dòna Laurence BOETTI-FORESTIER, dau conselhier departimental sénher Francis TUJAGUE, de la cònsola de Coarasa dòna Mònica GIRAUD-LAZZARI e d’un public numerós vengut de Coarasa per la màger part mas tanben de Brelh, Grassa, La Còla (de Lop), Bendejun, Niça, Berra,…
Vos presentam çai-sota li paraulas de remerciaments que Joan-Pèire BAQUIÉ prononcèt en aquesta ocasion.
Dòna conselhiera regionala, sénher conselhier departimental, dòna cònsola,
Cara Mònica, cari coarasieras, cars coarasiers,
Es un onor dei grans que mi fètz ancuei embé la remessa de la medalha de citadin d’onor de la comuna de Coarasa. Sobretot qu’es basta la segonda que balhatz, la premiera, es estada balhada a Lucilla Galeazzi, una cantairitz de tria qu’a animat mai d’una serada e d’un estatge en la vòstra comuna.
Estent que siáu curiós de natura siáu anat refestonar en la sieu pàgina Facebook per veire lo sieu profiu. Lucilla faguèt d’estudis de pedagogia e de filosofia a l’Universitat de Roma. A 5000 amics FB. Mi siáu pensat un moment de li demandar l’amistat, mas la conoissi pas e per ieu l’amistat si bastisse au quotidian, dins de relacions umani e non pas embé un clic d’ordinator. Alora esperi de la conóisser un jorn, a Coarasa ò a Roma per escambiar sus cen que fa que siam estacats, tant ela coma ieu, a Coarasa e ai sieus estatjants.
Coarasa es tot un simbòlo per ieu. Aqueu dei rescòntres umans que l’i faguèri. De segur vau començar per Alan PELHON e MAURIS, doi amics, doi fraires qu’avian da dire, que contavan lo país escagassat mas finda l’amor. Quant de còups m’en siáu puat a Coarasa per una serada occitana !
Pi l’i rescontrèri d’autri personas coma Ricard LAZZARI que mi parlèt d’aquesta idea un pauc fòla e destartavelada d’un campionat dau monde de pilo qu’a fach camin despí estent que ne’n siam aquest an au 28en Campionat dau monde (lo 2 de julhet dau 2016). L’i rescontrèri Mònica GIRAUD-LAZZARI, la cònsola embé lo sieu desideri de donar mai de plaça a l’occitan en la sieu comuna embé lo labèl òc per l’occitan, una plaça per la lenga dins lo jornal municipal, lo site internet, dins lu audio-guidas, lo monta-cala (lo percors de bicicletas) e ne’n passi…
Rescontrèri Audeta LEPAGE que sosten la lenga embé de sentenças en occitan en bas de cada article de « So Portal », rescontrèri Alain RIBIERE que nen faguèt visitar lo vilatge embé gaubi, rescontrèri Miquèu BORSOTTO embé cu fagueriam una emission sus França3 e un travalh en lenga sus lo sieu libre consacrat a la capèla Sant Sebastian, rescontrèri (en junh dau 2008) finda per un travalh sus lo coarasier dòna BERMON Fina naissuda MARI e dòna BERTON Anna naissuda CAPATTI, de fremas que tenion la lenga dau breç e qu’èran fieri dei sieu originas.
Toi aquestu rescòntres e d’autres de segur, son estats important per ieu. M’an permés d’avançar en la conoissença d’una comunautat que vau anar de l’avant sensa renegar lo sieu passat.
Alora lo vos dii tot franc, mi senti coarasier dins l’ànima. Alora se mi volètz coma un dei vòstres, vos pòdi afortir coma lo diía Alan PELHON : siáu de la familha.
Joan-Pèire BAQUIÉ lo 26 de junh dau 2016
Credit fòtos : Alain RIBIERE
RESPÒNDRE A L’ARTICLE :
Felicitacions Joan-Pèire. Baietas a vautres doi. Choaseta e Geraldo
Très beau cousin. Bises. Marie Ougie
Tu ne mérites rien de moins ! Alice Whiterabbit
Bravo, félicitations ! Nicolas B.
Adieu Joan-Pèire,
Veni de legir que as reçauput la medalha d’onor de Coarasa que li siatz que doi… doi personatges ! Siáu pròpi content per tu, per Coarasa e per ieu de ti aver rescontrat e de ti conóisser despí tant d’annadas. Viva l’amic ! Miquèu Borsotto
un onor de mai, baietas jm e co
Ti benastrugui d’autant mai, Joan-Pèire, qu’aquela destinccion ven d’una comuna que fa d’òbras positivas per la lenga nòstra. Òsca a tu e a Coarasa ! Jaume PIETRI.
Òsca, President, totei lei mieunas felicitacions . Una pròva d’amor, qué !
Es un onor grand de ti conóisser e de travalhar emè tu. Longa mai !!!! Maurici CASCIANI
Brave JP ! Baietas. Aurélie Péglion
La classe 😎 Corinne Borsotto
La classa, de segur ! E Regina es superba ! Marie Jeanne Verny
Stupendi ! Alessandra Verra Albesano
BRAVO !!!!!!! Eveline Maiolino
Adieu Joan-Pèire,
Primier felicitacions. As ben meritat dau nòstre vilatge. T’aremerci de m’aver mencionada dins ton messatge ai Coarasiers (mé la tieu bèla lenga vertadièra !). M’a esmòugut. Mi siáu remembrada Fina e Anna que nen demendavan « ai ben respondut ? es ben aquò ? », coma a l’escòla ! Encara bravo e mercès. Doi baietas. Aud.
Felicitacions Joan-Peire. Philippe Martel
Bravo JP. Et normal, ton taf restera. Emmanuel Aguera
Pas su …j’étais à Coaraze . Bravo ! Joelle Péglion
Vos aremercii toi per lu vòstres messatges d’amistat. Es estat un moment dei grans a Coarasa, que saup coma de costuma reçaupre e far fèsta. La baieta. JPB