Car(-a) amic (-ga) e sòci(-a),
L’aventura informatica de l’IEO-06 comencèt fin de 2004 embé la creacion d’un site dedicat a la lenga e la cultura occitani. Au principi la tòca èra de pòrger li activitats de la nòstra associacion e de la ben faire conóisser.
Ben lèu lo monde comencèron de nos mandar d’informacions. Li nòvas anonçavan un espectacle, un balèti, un cors de lenga que si durbia, anavan mai luenh que lo quadre de l’IEO-06. Aquesta dubertura siguèt fruchoa per nautres e avèm començat d’afrairar d’autri associacions coma l’Escomessa (Canas), lo CCOc-País-Niçard e Aupenc (Niça), Sota Òrme (Gòrb), la Société d’Art et d’Histoire du Mentonnais (Mentan), Cantar lo País a l’Escòla (Sant Cesari), la Companhia Vocala (Cabris), Si canta, si ditz (Sant Andrieu de la Ròca), Alp’Harmonia (Coarasa), d’Aqui d’Aià (Sant Joanet), Lo Cepon (Vença), Issue de Secours (Niça), L’Association du Vieux-Village de Saint-Laurent-du Var (Sant Laurenç) eca… Brefle lo malhum virtual venia un malhum associatiu e uman, ric d’escambis.
La creacion literària venguèt a comptar dau 2006 embé la creacion de cronicas setmanieri (Ressons d’Aquí, Ribon-Ribanha, la cronica de l’Agachaire que devem a Andrieu SAISSI, Anna-Maria MILARDI, Joan-Ives ROYER, ai sòcis de l’IEO e mai d’autres) sensa denembrar l’actualitat emb’ai cronicas de Miquèu PRAT en occitan aupenc.
Ancuei avèm despassat lu 2000 articles. Tractam de toi lu subjècts e siam liejuts en lo monde entier (Euròpa, Àfrica, Amèrica, Asia e meme en Autralia dont avèm un lector fidèl). Avesinam lu 300 000 visitors.
Embé l’ajuda d’Anna-Maria MILARDI, de Bastian DONATO per la partida concepcion, « lo siti persègue lo sieu espandiment. Avèm l’esper de l’i èstre totjorn de mai a s’investir per lo rendre passionant e inovant per fin que done de la cultura occitana una concepcion moderna e de lònga orientada endavant ».
Se per cas l’aventura dau malhum associatiu vos agrada, cercam quauqu’un mai, competent en lenga, per n’ajudar a metre en rega d’articles. Es quauqua ren d’apassionant e de formator. Per aquò faire asperam lo vòstre corrièl a ieo06@ieo-oc.org vos tornerem contactar.