Diménegue 3 de març, lu caminaires de l’IEO-06 s’èran donats apontament a Bendejun, davant lo bastiment de la comuna.
Lo tèma de la jornada : Lo camin de l’aiga.
Cau saupre que fònts, sorgents e beals an fach la riquessa dau vilatge e lu paisans d’un temps calavan vendre li sieu ortalhas fins a Niça.
Asperada da Joan-Maria ROSSET (responsable de la caminada) e da Renat BERMON, la pichina chorma fòrta de 25 personas, s’es endraiada premier, en li carrieras dau país a la descuberta dei fònts. Pi avèm pilhat lo camin dei campanhas dont lu beals ben visibles son encara utilizats.
Lu nòstres pas nos an menats fins ai sorgents que donan da beure a cada familha dau vilatge.
Au retorn si siam fermats au quartier dei Salas en cò de Carlòta e Joan PEIRAUT per un aperitiu dont Renat BERMON nos regalèt de quauqui cançons sieui e nos cantèt « Aiga », una cançon de circonstança.
Lo past si debanèt a Camp de Castèl, en cò de Joan-Maria e Elisabeth dins l’amistat e la convivialitat. En fin de past la jòrgina de Jò e lo Saxo d’Anhès anoncèron Jòrgi GHIRARDI que nos contèt l’istòria sieua dau « Pastre amorós ».
En l’après-dinnar, lu caminaires anèron visitar lo plantier de Joan-Pèire IVALDI(1), un luec de tota beutat, per una liçon (bilinga) de geologia sus l’arc dau PALHON.
La caminada venenta si debanerà lo diménegue 14 d’abriu dau 2013 passerem pròche la bauma e la piramida de la Ratapinhata, lo Mont Cau e lo vilatge de FALICON. Reservatz ja la data sus lo vòstre agenda.
(1) Professor onorari de l’Universitat de Niça-Sòfia-Antipolís.
Fòtos : Regina BAQUIÉ