Venem de reçaupre un publicitat de l’Espaci Occitan-ieo 04-05 que prepausa mai de 3000 libres en occitan e en francés, CD, DVD, e.c.a… An seleccionat entre autres lo DVD Malatèrra que presenta tanben lo film sus lo filmatge. Per aquelu qu’an pas vist lo film sus França 3 vaqui un compendi de l’istòria…
« La familha Morgon viu en Provença Auta dau temps de la guèrra de 14. Lo vielh Morgon regna sus son monde.
Totes esperan lo retorn dau paire dispareissut a la batesta de Peròna. L’ambient es lord entre lo vielh, la filha, la filhada, e lo joine. Impossible de se parlar. Un estrangier arriba dins l’ostau e tot vai anar lèu. Anam descubrir a travers eu lo secret. Un secret liat au vilatge abandonat de Malatèrra onte degun deu montar, un vilatge maudich.
Lo misteri es menat coma dins un polar. Lei paisatgis filmats dins la vau de Jabron, costat Sisteron, son d’una granda beutat. Es clar que l’i aguèt un trabau sus l’imatge e la lutz. Vos farà n pensar a un western. « Lei gents uroses an gis d’istòri » es per aquò que fau pas s’estonar de trobar una familha Morgon ruda e embastardida.
Philippe Carrese, lo realizator de Malatèrra, voliá faire un film en provençau « sens lavanda e sens cigala ». De tot segur siam pas dins l’imatge costumier. Es aquò que fai de ben.
Rogier Pasturel que fai lo vielh Leon Morgon aguèt un premi per son juec au festivau dau film de ficcion de Sant Tropez. Autra mencion per lo trabau dau director de la fotò Sergio Del’Amico.
Lo film fai una ora 35 e lei dialogues son en occitan e en francés. Una publicitat disiá 70 % occitan. Trobaretz perèu lo film sus lo filmatge (making-off), de fotòs e lo scenariò ambé l’integralitat dau texte ambé lei dialogues en occitan e en francés.
DVD dau film Malatèrra de Felipe Carrese – 95 minutas
Disponible a l’Espaci Occitan
25 € + 1,60 € per lo postatge. »
ESPACI OCCITAN / IEO 04-05
21 charriera de l’estamparia¡
05 000 GAP
Tel / Fax: 04 92 53 98 40
espaci.occitan@wanadoo.fr