Lo Plan de Santa Margarida (comuna dau Bròc)
A 25 qm de Niça, podetz vos passejar l’annada tota sus lo Plan de Santa Margarida. La passejada dura 2 oras de temps e presenta minga dificultat. Esquasi ren en denivelat vist que fem lo giro d’un planistèu. Podetz utilisar sigue la carta Michelin n° 195, sigue la carta IGN 1/25000 n° 3642est : Carròs.
Despí Niça, remontatz la Comba dau Var per la rota N 202. Au pònt de la Manda, traversatz Var e pilhatz la direccion de Carròs lo Vielh e dau Bròc. A la sortida dau Bròc, a man drecha pilheretz una pichina rota que mena a la capela de Santa Margarida. Podetz vos parquejar aquí.
En faça la capela li es una bastida pròpi bèla dau sécolo XVIII, s’avètz fortuna li veiretz finda un estròp de feas.
Pilhatz a seneca de la capela (quora regarjatz la bastida), una pichina rota que cala, viratz sus lo còup a drecha. Sus d’un quilometre es esquasi plata e siatz au mitan d’euses, de boís, de càes… Arriberetz a una bèla maionassa a l’ombra d’un tilhul : La Portisòla.
Gaire plus luenh sus lo camin auretz una bèla vista sus lo vilatge de Gileta ajocat sus lo sieu rocàs.
Aquí, gaire plus luenh siatz au quartier dau Prat de la Vinha, pí en aqueu dau Pichin Plan dont li son de mas au mitan d’òuliviers pròpi ben tratenguts.
Cau seguir aqueu camin fins a la cisterna d’aiga per parar lu fuecs. A la cisterna aneretz a seneca per anar au quartier dau Plan dont li son de cavaus en libertat dins un parc.
Pauc a cha pauc la vista si duerberà sus li còlas niçardi de l’autre costat dau Var. Arribat au transformator, troberetz una pichina rota e vireretz encara a drecha per arribar 500 metres mai luenh a la capela Santa Margarida.
S’avètz encara un pauc de temps au retorn, vos fermeretz a Carròs dont lo nom dei carrieras son escrichs en lenga, tot parrier au cadran solari de la comuna.
