Cars amics e sòcis,
Après de vacanças ben ameritadi, l’IEO-06 alestisse la sieu rentrada : lu 5 cors de lenga, lu ataliers de cant, de danças, de teatre, li caminadas, li jornadas descuberta dau país, la biblioteca, lo site, li conferenças, la toponimia, la dictada occitana, eca… Siam a faire un desplegant per vos dire tot aquò de maniera precisa ( datas, luecs, oraris,…)
Avèm l’esper de vos veire encara mai numerós aquesta annada a Niça, Grassa, Drap, la Còla (de Lop) dont si debanan la màger part dei nòstri activitats.
Lu vòstres animators son lèsts e requinquilhats. Parlatz au vòstre alentorn de la vòstra associacion : cu siam, cen que volem, lo projèct qu’avèm per la lenga e la cultura.
La Cronica Ribon-Ribanha s’es arrestada ai mes de julhet e avost. Granmercí ai autors qu’an ritmat li sieu doi annadas d’existença, dins l’òrdre de parucion, Anna-Maria M, Evelina, Verònica M, Giacomo, Joan-Pèire B, Daidier LM, Viviana, Annia, Raimond, Reinat, Anna-Maria SG, Françon, Choasa, Maurís, Joan, Carlòta, Miqueu, Ivòna, Maria, Joan-Pèire S, Valeria, Sarà e Verònica D, Magali B. Esperem d’aver denembrat degun…. Aremerciam tanben l’IEO-PACA que, mai d’un còup, donèt lu liames que remandavan ai cronicas, nen permetent ensinda d’alargar lo sieu public e, ben segur, lo nòstre lectorat da sempre fedel.
Avèm lo desideri de persegre una terça annada emb’ai vòstres tèxtos, li vòstri creacions. Siam segur qu’avètz encara de cauas da dire, da contar, da faire viure en rega ai sòcis e amics de l’IEO-06. Vos demandam de gaire tardar qu’avèm ges de tèxtos d’avanças e donca l’escomessa es un pauc fòla. Donca ai vòstri plumas, estilòs e claviers.
Podètz contunhar de nen mandar li vòstri òbras a l’adreça ben conoissuda : ribonribanha@yahoo.fr. Anna-Maria MILARDI, que s’es entrevada dau site tot l’estiu, es a asperar.
Lu 1ier, 2 e 3 d’octòbre venents, l’IEO-06 tendrà banc au Festenau dau libre de Moans-Sartòu. Avèm da besonh de monde per tenir l’estand una oreta ò mai se podetz. Pensatz de vos marcar pròche Carlòta RUBINI, la nòstra segretaira : segretariat.ieo06@yahoo.fr
Vos desiram una rentrada doça, facha de pichins bònurs, d’amistat e de convivialitat. Lu animators de l’IEO seràn a la vòstra escota per una annada occitana fruchoa.
PE : Lo temps d’escriure aquesti regas. Magali BIZOT-DARGENT ven de nos mandar un premier tèxto per Ribon-Ribanha. En mai serà presenta sus lo nòstre estant a Moans-Sartòu lo 2/10 per firmar/signar lo sieu libre : « Questions essencialas e autrei escrichs minusculs » (IEO-Edicions ATOTS). Cocanha ! Un eveniment de pas mancar.