Rescòntres occitans en Provença 2012

Aquest an, es en Anòt que si debanèron lu Rescòntres occitans en Provença.

Alentorn de 150 personas participèron ai doi estatges e ai ataliers divèrs. Toi èran venguts per emparar, escriure, charrar, escambiar, cantar, balar, botar, visitar, si passejar, faire de teatre e ne’n passi.
Lo luec èra agradiu, au mitan dei castanhiers e dei pins, a doi pas d’una fermada dau tren dei Pinhas. Mai d’un estatgiari utilizèt aquest meso de traspòrt per l’i venir ò s’en tornar au sieu.

Siguèt lo cas de Natàlia BICHURINA, una universitària russa de Sant Petersborg. Aquesta domaisèla, que parla un occitan de tria, nos faguèt una conferença sus li minoritats lingüistiqui dau sieu país. Nos parlèt tra autre d’una minoritat albanesa estabilida en russia despí mai de quatre sègles.

D’autres joves coma James COSTA ò Celina BAQUIÉ nos assabentèron sus la trasmission de la lenga ò nos parlèron de la « plaça d’Alan PELHON dins la leteratura occitana »

Jaume COSTA

Celina BAQUIÉ

L’auditòri dau temps dei conferenças

Tot lo temps dei rescòntres viveriam d’autres moments fòrts e non prevists coma lo rescòntre de doi cantairitz d’expression occitana : Hombeline e Guylaine RENAUD, lo natalici de Regina, frema de Rotland, lo coïnier ò la suspresa d’un pastisson en l’onor dau maridatge recent de Marc e Danièla. Viva ai nòvis !

Guylaine RENAUD e Hombeline

Sigueriam urós de veire que de joves èran presents per donar un avenir a la lenga. L’escoleta tanben faguèt miranda dins la presentacion de l’istòria ben conoissuda dei tres porcons.

Si porria parlar totplen dei rescòntres occitans en Provença, mas lo mielhs es de li venir l’an que ven per lo viure dau dintre. Per vos donar envuèia vos prepausi de descurbir encara quauqui fòtos embé la sieu legenda.