Amics occitans, la cronica Ribon-Ribanha d’ancuei, titrada « Palhon reven » es prepauada da Robert PITTIN escolan dau cors de Contes e soci de l’IEO-06. Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
Palhon, reven.
Lu lançòus ,alongats sobre lu còdols au soleu, secan.
Las d’aver bulhit e rebulhit
Lu toalhons onchs d’oli e tacats de sauça,
Barjacan de la darriera recèpta a la mòda.
L’aiga es clara, la bugada es acabada
Li nèblas son arribadi sensa ren dire
Lo soleu es anat s’escondre en si faguent una fora de rire.
Lo tron s’es fach audir sensa retenguda
Lu lamps an illuminat aqueu cèl cargat de nèblas
La raissa a finit per esclatar, l’aiga clara per s’encalar
Palhon s’es drevilhat, tot en un còup
Sortit d’un lòng penec estivau,desplegant li sieu aigas vivi
Coma un cavau que s’entorna a l’estable
Palhon embé totplen de força a ragantat la mar
L’aiga clara es arribada, la bugadiera s’es enanada.
(Robèrt Pittin)
