Amics occitans, la cronica Ribon-Ribanha d’ancuei, titrada « Li platanas de la Platonha . » v’es prepauada da Rogier GILLI sòci de l’IEO-06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc !
Li platanas de la Platonha
La calorassa dau principi d’este-l’estiu nen comandava, per si refrescar, sigue de cercar una ombra agradiua, sigue de si campar en la mar ò de si garçar en un super mercat climatizat per aprofitar dau frescor a jaba, e faire calar la temperatura interna dei nòstres paures organismes tribulats dai condicions climatiqui anormali.
D’un temps, quora faía caud en vila, lo monde s’enanavan s’assostar sota lu grans aubres. L’i es ren de pus ben que li platanas. Parli aquí per lu Niçards que an conoissut li platanas maestoï de l’avenguda de la Victòria (Joan Medecin) e de ben d’autres luecs. Ailàs lo chancre vengut en lo 1944 embé lu cartèus fachs de lenha de platanas americani clavelats sus lu sieus troncs e sobretot lo novèu trambalan li mandèron en tèrra e li remplaçèron dai fabrecoliers encara nanos, per li generacions futuri. Ieu mi pensavi que aquesti platanas, ‘mé lo mieu regard d’enfant, èran li mai grani de la planeta mieua. Mas…
Quauqui annadas fa, la mieu conhada Cristina crompèt un ben en riba drecha de Dordonha. Aquesta proprietat costeja un ancian camin de tira e lo premier còup que l’i anèri, siguèri laissat nec dai doi platanas monstruoï que enquadravan la porteta, accès pedon dei visitadors. Sus lo còup acapissèri perqué un avia sonat aqueu ben : La Platonha*, contraccion de Platana e Dordonha. Ficanàs coma sieu, mesurèri li sieu circonferenças : circa 6,70 mètres e l’autessa d’un immuble de cinc plans. Li raïç que passan sota la pichina rota, s’encalan en la ribiera per aprovedir aquestu doi gigants que dominan lu aubres alentorn e siervon de para-soleu a la maion. Un paradís per lu aucèus mai que numerós, que l’i si venon assostar ; palombs, piverds, estornèus, gaças, corpatàs, esparviers eca… e de nuech ; machòtas e nècholas. E finda lu esquiròtos maliciós que si garolhan sus li brancassas, jugant a la si persegre. En confront aqueli de Niça mi semblavan pròpi mistolini.
Que plaser, en aquesto mes de julhet, parats dai ombras sieui, quora la tofarassa n’esquiçava encara un pauc a l’ora de l’aperitiu dau sera, de si faire calar quauqu gòtos de vin claret ben fresc, e sensa moderacion, aluchant la ribiera quieta que raia pelandronament fins l’estuari.
Quant n’an sus l’esquina aquelu doi gigants impassibles ? Cent cinquanta bessai doi cents ans, degun lo saup, manco a la maion comuna de Santa Tèrra.
Quant n’an vist passar de Gabarras, que s’encalavan despí Argentat, cargadi de bòsc merin per lu botás de Liborna e d’aqueli, quisti, que s’en tornavan ‘mé de sacs de sau, fins Flaujaga (Dont la flòta si jaça, d’après lo cònsol dau país. Es ver que la marea va pas pus luenh) ?
Quant n’an vist passar d’aquelu paures crístols, que sabian manco denedar, que ariscavan de si negar per pas crebar dau fam quora l’aiga èra de viatge ?
Quant n’an vist de plenas, quora li aigas bruti li banhavan lu pens ?
Quant d’istòrias nen porrian contar, elu, lu Mèstres dau luec ! …
A veire, de segur !…
*73 camin de Challon 33350 Santa Tèrra
Rogier Gilli – Julhet dau 2019
Les platanes de la Platogne
La grosse chaleur de ce début d’été nous invitait à rechercher soit une ombre agréable, soit à prendre un bain de mer ou encore, à investir un supermarché pour profiter gratuitement de la climatisation afin de faire baisser la température intérieure de nos organismes agressés par des conditions climatiques anormales.
Par le passé, quand la chaleur était là en ville, les gens s’abritaient sous les grands arbres, et quoi de mieux que des platanes ! Je veux parler ici de ces platanes majestueux – pour nous Niçards – de l’avenue de la Victoire (Jean Médecin) et de bien d’autres villes de notre pays. Hélas, tous ces beaux arbres ont été peu à peu minés par une maladie causée par ce chancre importé en 1944 par les pancartes des alliés faites de bois de platane d’Amérique clouées sur leurs troncs. Les travaux du nouveau tramway ont fini de les condamner et on les a remplacés par des micocouliers pour les générations futures.
J’ai toujours pensé que ces platanes, enregistrés dans ma mémoire par mon regard d’enfant, étaient les plus grands de ma planète. Mais…
Il y a quelques années, ma belle-sœur Christine a acheté un bien en rive droite de Dordogne. Cette propriété longe un ancien chemin de halage et la première fois que j’y suis allé je fus ébahi par les deux platanes monstrueux qui encadraient le portillon d’entrée. J’ai compris illico le pourquoi du nom de la propriété : La Platogne, contraction de Platane-Dordogne. Curieux, je mesurai leur circonférence : 6.70 m… ! Et quant à la hauteur, celle d’un immeuble de cinq étages ! Leurs racines courent sous la petite route et plongent dans la rivière pour nourrir ces deux géants qui dominent tous les arbres des alentours et servent de parasol à la maison, la protégeant des rayons du soleil.
Un paradis pour les nombreux oiseaux qui y trouvent refuge : palombes, pies, piverts, corbeaux, étourneaux, éperviers etc… et même les chouettes la nuit. Et aussi des écureuils malicieux qui jouent à se poursuivre sur les grosses branches. A côté, ceux de Nice m’ont paru bien riquiquis.
Quel plaisir, à l’heure de l’apéritif du soir en ce très chaud mois de juillet, abrités par leur ombre si généreuse, de dégûster, sans modération, quelques verres de vin clairet frais en regardant la rivière bien calme qui coule paresseusement vers l’estuaire.
Quel âge ont-ils ces deux géants impassibles ? Cent cinquante ou peut-être deux cents ans ? Même à la mairie de Sainte Terre, on l’ignore.
Combien ont-ils vu passer de gabares qui descendaient depuis Argentat, chargées de merrains pour les tonneliers de Libourne et de celle plus rares qui remontaient jusqu’à Flaujagues leur cargaison de sel ?
Combien en ont-ils vu passer de ces pauvres diables qui risquaient leur vie pour ne pas crever de faim ?
Combien d’inondations, ces eaux boueuses, ont-ils subi ?
Combien d’histoires, pourraient-ils nous conter, eux, les Maîtres du lieu ?
A voir, assurément !…
La Platogne 73 route de Challon. 33350 Sainte Terre.
Roger GILLI – Juillet 2019.