Amics occitans, la cronica Ribon-Ribanha d’ancuei, titrada « La socializacion de la lenga », v’es prepauada da Joan-Pèire BAQUIÉ, president onorari de l’IEO-06.
Asperam tanben lu vòstres escrichs per li cronicas futuri, que sigon racòntes dau passat ò dau quotidian, articles jornalistics, galejadas, poesias, cançons, scenetas de teatre, bandas dessenhadi…
a l’adreça : ribonribanha@yahoo.fr
« La garderem ribon-ribanha, nòsta rebèla lenga d’Òc !
La socializacion de la lenga.
Per una lenga minorizada es dificile de si faire audir : gaire de temps de paraulas en lu mèdias (Ràdio, television, jornals…) gaire de presença en l’espaci public en defòra de l’iniciativa de quauqui collectivitats (comunas, despartiments, regions) que meton per carriera de panèus de sinhalizacion bilingües.
Es ver que la legislacion n’ajuda gaire e soventifes li accions de menar pròches lu elegits son lòngui e penoï. De segur l’i son d’associacions qu’aparan la lenga e la cultura mas es qu’aquò basta ?
Es que si siam ja pauat la question : « De qué pòdi faire ieu solet en tant qu’individü ? ».
D’unu de ma conoissença meton de vestits, camia, malheta, capèu,… embé un eslogan en lenga, d’autres laissan de messatges sus lo respondaire telefonic en lenga dau tipe : « Siáu pas au mieu mas laissatz un messatge e tarderai gaire de vos respòndre » ; d’autres encara utilizan la lenga sus lu malhum e li pàginas sociali.
Tot aquò es ben mas devem multiplicar li ideas per fin que la lenga sigue de mai en mai presenta dapertot.
A titre d’exemple vos metrai quatre imatges e una video qu’illustran lo mieu prepaus :
Non si parquejar davant la pòrta ! Gramací !
(S’a pòrta d’una cantina a GÒRB)
(Sur la porte d’une cave à GORBIO)
Mèfi la pintura es fresca !
Sauvatz li datas : Calendier de la MJC Bòn-Viatge de Niça
Panèu en niçard plaça Massena Niça.
Vots en niçard a la MJC Agora Nice-Est : https://www.youtube.com/watch?v=wSI8Skr-gEU
Bòna annada ben granada e ben acompanhada !
Siáu segur qu’avètz d’ideas originali que podètz partir embé nautres.
Alora, laissatz-nen un messatge per assegurar mai de presença en l’espaci public a la lenga nòstra e ai autri lengas de França.
Joan-Pèire BAQUIÉ lo 6 de genier dau 2022
NOS AN ESCRICH :
Jaume Pietri : En Corsega arriba pron sovent de liéger dins la pressa (Per ex. « Corse- Matin ») d’anòncias de còps de crotz en lenga còrsa. Es pas enebit de concebre leis assabers de naissença o de maridatge en occitan o en bilingüe. Fau butar leis entrepresas regionalas a aver d’eslogans publicitaris en niçard , provençau o aupenc. Òsca an aquelei que va fan ! Amistats en totei.
Joan-Pèire SPIES : Pròpi bèu lo film dei vots !