Aviavam ja publicat, lo 11 de decembre dau 2007, « Lo pan banhat » de Joan Pizzo. A la demanda de totplen vequí un autre tèxto de Joan que li dion : Sovenirs de joinessa. Joan Pizzo emb’un pauc de nostalgia si remembra dei juecs qu’an bastit la sieu enfança, malurosament lo temps s’arresta pas…
per legir : lo pan banhat de Joan PIZZO clicatz sus lo titre.
Sovenirs de joinessa
Sus n’a cadiera lònga, coma dintr’un laüt
En plegant li parpèlas, ai vist folejar
Tota la mieu joinessa que reven m’atrovar.
Un pichin ventolet, en venent de la mar,
Renfrescava la nuech ; un esperfum amar
Mi pegava la pèu, recuberta de sau.
Li luèrnas passavan, pluguetant dau fanau.
Reveï, en imatge, en lo mieu bèu pantais,
La cara de ma Maire, afanad’au travalh.
Tres pichoi en li faudas, doi garçons, una filha
Eri lo pus mendiant de tota la familha.
A cinc ans èri grand coma doi sòus de toma !
Lu berris frisolats e la gauta redona.
Trotejavi alegre, la cartela en l’esquina
Per anar, toi lu jorns a l’Asil’appraxina.
Jugavi a la maire, ai pietos, a la pelòta
A pluga, a chalola, n’ai fach de cambaròtas !
Lo pichon a creissut, a cambiat d’escòla
Era lo temps urós, dai premieri badòlas !
Escòla Sant’Elena, mi reveï ‘scolan
Au mitan dei amics, si tenèm per la man
Son aquí, soguinhents e urós de mi veire.
Cadun vòu mi tocar, mi parlar e mi creire.
Toi mi charran dau temps, qu’anavi a l’escòla
A Fabron, ai fabrécolas, ai figas da Nicòla !
Au valon Pastorelli anavi ai tavans,
Pescavi li anguilas au valon de Manhan.
Per mi faire doi piés, portavi de cresson
Ai merchants de Carràs, sobretot a Tanta Zon
E m’ai sòus rabalhats m’aquel’erba de sorça
Mi crompavi belèu, de gròssi pega-doça !
Li annadas passavan, èri ben despacient
De devenir plus grand, pus furbo, pus sapient.
Aver de braias lòngui, de pels, de mostás
Una bèla camia, e… un parèu de bas !
De fes, d’escondilhon, ai bals de carriera
Anavi atrovar una bèla pressiera
Per la faire balar, e li cuntar floreta.
Era lo temps urós dei premieri baietas !!
Lo mieu pichin bonur èra tant bèu a veire
Urós e folaton, coma un copa-veire
Vivíi au present, sensa mi far de bila
La mieu vida d’enfant, tojorn a tèsta-pila.
Toti aqueli annadas son passadi tròup vito
Eri dejà madur e tojorn sensa pitos !
Ai cercat paure fòl ! d’arrestar lo relòri
Mi siáu enavisat qu’èri un bèu tabalòri !!
Fach lo 5-10-1979 Joan Pizzo