Aquesta an, l’AG de l’ieo-06 si debanèt a Moans-Sartòu, a la mediateca municipala. Siatz estats numerós a vos desplaçar per aqueu moment fòrt de la vida de la nòstra associacion. L’annada 2005 foguèt rica d’eveniments. Vequí lo rapòrt d’activitats e lo rapòrt morau que presentèri lo 21 de genoier dau 2006.
I – Rapòrt d’activitats de l’annada 2005 presentat da Joan-Pèire BAQUIÉ, President sortent a l’Acampada Generala dau 21 de genoier dau 2006 (Moans-Sartòu)
Cars amics e sòcis,
Aquesta annada es una annada un pauc especiala au nivèu dei simbòlos, anam festejar lu 30 ans de IEO-06.
30 ans es pas ren per una associacion qu’a vist passar de fremas e d’òmes fiers d’una lenga e d’una curtura milenària e que la volion aparar e desfolopar. (Vos donarem totara la paraula per fins que tot lo monde posquèsse s’exprímer sus d’aqueu subjèct.
Lo premier, a nos endraiar dins aqueu camin, foguèt Jòrgi GIBELIN, lo premier president de l’IEO-06, lo rementavi ja l’an passat a La Còla. E li devem totplen. (Es pas d’azard se la nòstra seccion si sòna Jòrgi GIBELIN).
Remercii la comuna de Moans-Sartòu per lo prest d’aquesta bèla sala e toi aquelu que si son desplaçats per l’A.G. qu’es un moment fòrt de la vida d’una associacion.
V’auguri segon la tradicion « una bòna annada 2006 ben granada e ben acompanhada », per vautres e li vòstri familhas.
Vequí lo rapòrt d’activitats per l’annada 2005
1° Li jornadas « Descuberta dau País » :
Son sempre l’ocasion de viure de moments d’amistat, de convivialitat, de tèisser de liames en lenga a l’entorn d’una sortida que fa conóisser l’istòria, la geografia, li activitats sociali, economiqui e curturali dei gents que vivon dins l’endrech. Es una tòca importanta de l’IEO.
Aquest’an avèm organizat 3 sortidas ( 4 l’an passat) : una dimenjada dins li valadas occitani d’Itàlia lu 14 e 15 de mai (48 participants), una escoreguda botanica a la montanha de Tièlh lo 5 de junh (32 participants), e ben segur la dimenjada-manifestacion a Carcassona (72 participants) qu’a mobilizat totplen de monde e d’energia. Aquesta manifestacion foguèt una capitada (sensa exagerar 10 000 a 12 000 personas èran presenti). N’avèm parlat dins mantun article sus lo nòstre site e devem aüra traire toi ensems lu ensenhaments d’aquesta jornada.
De signalar que li sortidas son duberti ai familhas e amics. Mercí totplen ai organisators d’aquesti sortidas (vòli aremerciar a titre personau e au nom de toi Marcèu MANCINI per li sieus competéncias e lo gaubi qu’a per organizar li sortidas).
2° Lu talhiers de la seccions :
Aquest’an avèm dubert un novèu cors de lenga (a Niça).
Lu quatre cors de lenga setmaniers recampan sempre totplen de monde 73 personas (65 personas l’an passat).
Gràcia a de bòni volontats lo cors de Grassa persegue lo sieu camin. Mercí totplen a Andrieu GOYOT, Frederic MARTRON, Joan RAMI, Andrieu SAISSI, e toi lu sòcis que nos ajudan a Grassa.
Per memòria citerai lo cors de Sant Jaume (30 escolans marcats) aqueu de la Còla (13 escolans marcats), aqueu de Montaurós (10 escolans marcats) bailejat da l’amic CHABAUD, aqueu de Niça (20 escolans marcats). Merci encara un còp ai professors e ai escolans fedèls.
Lu talhiers de danças populari d’òc recampan a Grassa cada 15 jorns toi lu afogats dei baletis (30 personas e de còp mai) sota la direccion de Choaseta GANDOLPHE e Maria Crestina BRAVET d’una part e Maria-Jousèp CARRERE e Joan-Pèire CHIAPELLO de l’autra, en alternança. Vòli mercejar li balarinas e lu balarins qu’an fach lo desplaçament a Niça lo 9 de decembre per lu rescòntres interculturaus musicals de Bòn-Viatge.
Aquí tanben cau notar la dubertura d’un cors de danças tradicionali a Niça que recampa una dozena de persona, un còp lo mes a l’Agora Nica-Est. N’aprofiti per remerciar Choaseta e Giacomino GENTI animators d’aquest talhier e li sieu filhas Fanny e Manon que nen fan la mùsica.
LO GRAMON cèucle locau de l’IEO-06 a Niça :
Coma lo sabetz, LO GRAMON cèucle locau de l’IEO-06 participa tanben a l’organizacion d’un festenau inter-curturau despí 10 ans. Aquesta annada per la partida occitana son venguts lo 9 de decembre lo trio a Capelà Daniela e Marjolaine Franzin e Thierry Cornillon ; Lo grop Occitaniss’ que nos a fach lo baleti. Lo divendres 20 de genoier 2005, avèm reçut lo grop « D’Aquí d’Aià » e la cantairitz provençala « Hombeline » . Avèm tanben participat a la « Prima de la Poèsia » a l’Agora Nice-Est.
3° L’ensenhament
Per nautres es un sector clau. Sostenem tant l’Ensenhament Public coma li Calandretas.
Siam mai que deçauput per la politica de l’Estat rapòrt a l’ensenhament de l’occitan. Per 33 departiments dau domani occitan, la chifra dei pòstes au CAPES d’Occitan-Lenga d’Oc es de 4, coma l’an passat. Dins lo primari ren bolega, ò pulèu pus ren si passa. Aquò vòu dire, se ren cambia, la mòrt programada de l’occitan.
Per fortuna, avèm una bòna nòva, la Calandreta de Drap contunha la sieu draia e lo sieu espandiment (per la quarta annada). En defòra de la classa materna (Magistra Florença BUATOY) , li son doi cors adults : un a Drap (Animator Joan-Pèire SPIES) e l’autre a Coaraza (Cristòu DAURORE). La calandreta a organizat en 2005 un centre aerat d’una setmana a Niça (embé 20 pichoi) e a lo projèct de ne’n faire un autre de doi setmanas en 2006, en mai va durbir d’activitats peri-escolari tanben a Niça.
Remembri que li calandretas son d’escòlas laïqui, a gratís, duberti en toi e que demandan la sieu integracion dins lo servici public.
4° La creacion :
« La fe sensa òbra, mòrta es » aquò es la devisa de l’IEO. Podem pas cad’an faire de diccionaris ò de gramàticas ! E mai si vendèsson ben. Aquest’an siam estats demandats (Andrieu SAISSI e ieu) per d’associacions per fins de metre en grafia normalizada de tèxts de cançons, tèxts que si son retrovats sus de discs sarrats. Citerai per memòria lo CD « Caminada » de la Companhia Vocala, lo CD « Quauqu mòts d’aquí » de l’associacion « Si canta si di », cançons cantadi da Crestian Bezet e lo CD « Finestra dell’ultimo piano » dau grop Paròplapi (en provençau, italian, francés) qu’a demandat a metre lo logò de l’IEO-06 coma logò de qualitat sus lo sieu CD.
Cresi qu’es una idèa que deuria faire camin, vist que l’associacion « Alpharmonia » qu’a una corala e que vòu faire paréisser un CD, nos a demandat de metre en grafia alibertina, toi lu tèxts dei cançons dau sieu repertòri. Mi pensi que lo sagèu « IEO-06 » mes coma « logò » sus d’una òbra porria èstre sinonim per l’escotaire de « qualitat », de tota maniera d’una mena de respèct rapòrt a la dignitat de la lenga.
Podem pas nimai passar sota silenci lo « RESSON D’AQUI », que cada setmana, pareisse sus « Nice-Matin » edicion Grassa. Se la responsabilitat d’aquesta cronica es estada donada a Andrieu SAISSI au nom de l’IEO-06, lu articles son aquelu de toi lu sòcis de l’IEO-06 que li vòlon escriure. E aquí, que bèla leiçon per lu legeires que vèon cada setmana ò quasi un nom diferent que firma l’article. E òc, a l’ieo-06 es pas una soleta persona qu’escriu, fèm una òbra colectiva.
Prepausi se lo projèct contunhia e li a pas de rason que contunhèsse pas, de ne’n faire un recuelh d’aquí un an (per exemple) per fins de l’estampar. Aquò porria servir a de legeires individuaus mas tanben a de professors de lenga.
La difusion de la produccion occitana :
Coma cada annada es lo festenau de Moans-Sartòu au mes d’octòbre que dona l’ocasion la mai grana d’escambiar emb’au monde que visita lo nòstre estand e de vendre la nòstra produccion. Rapòrt a l’an passat avèm un pauc mai vendut e nen siam contents. Merceji toi aquelu, numerós, qu’an tengut l’estand au festenau de Moans. Andrieu Goyot nos a demandat d’èstre descargat dau sector « libres » per de rasons de santat, lo mercejam per tot lo temps qu’a consacrat en aquest travalh. Siam donc en cerca d’una persona per animar aqueu sector (tenir l’estòc, passar li comandas, si tenir au fiu dei parucions, eca..)
5° La vida de la seccion :
Eravam 124 sòcis a l’IEO-06 en 2005 (135 en 2004). La chifra deuria remontar en 2006, que lo sector de Niça en bastison, es fort d’un vintenau de personas noveli e de doi associacions afrairadi en mai (« Si canta si di » e « Alpharmonia »)
Lo burèu s’es acampat 5 còps a Niça e a Moans de maniera regulara en mai de l’AG de l’IEO lo 15/01/05 ; lo 12/02, lo 09/04, lo 21/05, lo 17/09, lo 26/11. Devi mercejar lu membres dau burèu per la sieu ajuda. Avèm participat a l’A.G. e un C.A. dau CREO-Provença (lo 12/03 a s’Ais de Provença e lo 05/11 a Boc Bèl Er, l’AG. Venenta si debanerà lo 4 de febrier 2006 a l’Ostau de Provença a s’Ais).
6° Li nòstri relacions emb’ai associacions amigui :
La sinergia tra associacions a encara ben fonccionat aquest’an .L’ajuda dau GRAMON per exemple, a la Calandreta de Drap : formacion dei animators dau centre aerat, remplaçament de la magistra en formacion (3 jorns), la participacion a l’animacion pedagogica dei magistres.
L’ajuda lingüistica ai associacions amigui afrairadi : « la « Companhia Vocala » , « Alpharmonia » e « Si canta si di » nos a demandat totplen de temps e d’energia. Lu escambis son estats mai numerós que l’an passat sobretot gaug au site qu’avèm creat. Metem en rega tot cen que tòca a la vida dei associacions afrairadi.
7° Lo site de l’IEO-06 sus la telaranha
Despí lo mes de novembre dau 2004, l’ieo-06 a lo sieu site « http://ieo06.free.fr/ », 497 articles son estats escrichs en niçard, provençau e francés. Mai de 620 messatges son estats mandats per d’internautes sus lu foroms ò en respòstas a d’articles mes en rega. Siam liejuts dins lo monde entier (mai de 28 000 personas, dins un centenau de país, an liejut 73 000 pàginas) De messatges de simpatia e d’encoratjament arriban cada jorn.
Un site deu vivre. Avèm besonh de la vòstra ajuda per reagir ai articles escrichs (mandatz un pichin mòt per dire cen que pensatz de tau ò tau article, per lo criticar, apondre quauquaren mai. Se li anatz pas veire vautres de l’ieo-06 passam a costat d’una partida de l’objectiu dau site. Lo site pòu servir de liames tra sòcis que pòdon escambiar sus lu foroms, tra associacions afrairadi. Podetz mandar de fòtos mumerizadi dau cors de lenga, d’un baleti, d’una sortida… Podetz mandar un rendut-còmpte de sortida de l’IEO, una informacion, un tèxto, un article qu’avètz escrich, eca…
Pòdi apondre que li associacions amigui qu’an un site ò una boita postala electronica an un liame sus lo site de l’IEO e que podem passar dau site de l’ieo-06 en aqueu dau CCOc-País-Nissart ò aqueu de la Calandreta, dau Cepon, la boita postala de Piada Deliura e dau Gramon… per parlar basta dei associacions afrairadi
Aquelu que recevon pancara lu articles de l’ieo-06 sus la telaranha si porràn marcar per fins que li mandessiam tota l’actualitat occitana.
8° Lu projècts
Avèm en mai dei activitats tradicionali ja citadi, lo projèct de bilingüisme per lo nom dei carrieras de la vila de Drap. Avèm ja augut d’apontaments embé la comuna e aquò si metrà en plaça dins l’annada.
Un autre projèct emb’ai CEMEA, organisme de formacion d’animators de colonias de vacanças per prepausar un estatge BAFA 3 (50 oras), sus lo patrimòni regionau (Juecs tradicionaus, còntes, danças, cants, fabricacion d’instruments de mùsica…)
Vòli dire que toi aquestu projècts de socializacion de la lenga, li avèm pensats dins una amira de reconquista de la lenga e pas per faire una activitat de mai.
Volii apondre tanben que rapresentèri lo 17 de decembre, l’IEO-06 e lo CREO-Provença au rescòntre internacionau de balon-pen (Mónegue-Occitania), qu’en aquesta jornada parlèri basta occitan, lenga socializada emb’au monegasc per l’eveniment. Se volem socializar la lenga, mi pensi que cau crear d’eveniments. Lu 30 ans de l’ieo-06 nen donan l’ocasion. Alora cau revertegar li mànegas de la camïa e li si metre toi.
II – Rapòrt morau :
Coma venetz de l’audir dins lo rapòrt d’activitats, l’annada 2005 foguèt rica d’eveniments, per lo nòstre travalh, li nòstri recercas, li nòstri creacions leterari, li nòstri activitats…
Avèm marcat de ponchs embé per exemple, la cronica « Resson d’Aquí » dins « Nice-Matin (Grassa) » que socializa la lenga pròch lo grand public, la dubertura dau cors de lenga e dau talhier de danças a Niça ò lo site de l’ieo-06 qu’espantega li idèas de l’ieo-06 dins lo monde (esquasi 500 articles en 14 mes). Mas coma lo diguèri l’an passat mancam encara de monde per assegurar la releva, de personas formadi, cen que si sòna de « quadres ». Avèm un dever de formacion devèrs lu autres e d’auto-formacion, toi tant que li siam. Vòli encara aremerciar li personas qu’an permés au cors de Grassa de perseguir. Si devem d’anar encara mai luenh, sobretot aquesta annada dont aurem besonh de tot lo monde per festejar coma si deu lu nòstres 30 ans d’existança d’ieo-06.
Cadun si deu pauar la question : « Que fau, que pòdi faire per ajudar l’associacion aquest an ? »
Lu burèu s’acampa un còup cada doi mes, mas es pas un burèu barrat, toti li bòni volontats son li benvengudi, basta ne’n faire la demanda e seretz lu benvenguts ai nòstri acamps.
Farem tanben de radunanças especiali per organizar lu 30 ans de la nòstra associacion.
Autra preocupacion : En França, li lengas parladi per lu estajans son pas reconoissudi per l’Estat. L’occitan es amenaçat de disparéisser per manca de politica publica, de valorizacion e per toti li empachas au sieu usatge normau. Volem una politica publica positiva en favor de l’occitan en França. La premiera dei mesuras a pilhar seria de formar de professors e d’ensenhar la lenga d’òc. Maluroament despí tres ans la chifra dei pòstes au CAPES d’occitan-lenga d’òc en totjorn la pariera es a dire : 4. (Per aquelu que l’aurion pancara fach, vos demandam de firmar la peticion per lo CAPES d’Occitan-Lenga d’Oc.)
« Ren es simple e lo crostet lo si cau ganhar » coma diguèt Alan ROCH a Carcassona davant 10 000 personas. Si devem toi bolegar, si banhar la camïa per la nòstra lenga. Siam pas solets, la capitada de Carcassona ne’n foguèt la pròva e sobretot avèm vist de joves, totplen de joves, e de pichoi que si senton pertocats per aquò.
Au mes de julhet dau 2005, faguèri un CLSH (Centre de leser sensa aubergament) e aquí veguèri tot l’interés e la curiositat dei pichoi d’ancuei rapòrt a l’occitan au travèrs dei juecs (de lenga, esportius ò autres…) , cants, danças, rondas, patrimòni, eca… Mi pensi que devem si revirar devèrs la formacion d’amimators de centre de lésers : formar de formators que li es una demanda, parier per lu professors de lenga.
Devem tanben faire un travalh dei gròs d’informacion pròch lu elegits, lo consèu generau, lo Consèu Regionau, cen qu’avèm pas totjorn sauput faire, siáu lo premier a lo dire.
Prepausi adonc per l’annada 2006 de :
1° desfolopar l’axe de la comunicacion :
demanderai a toi lu sòcis de desfendre a titre personau li ideas aparadi per l’IEO e que son desfolopadi dins lo tèxto « Crida a manifestar(1)»
e que rapresenta au nòstre avejaire lo camin dont si devem endraiar) de parlar, d’escambiar en lenga lo mai possible dins lo cada jorn, d’èstre de militants de la lenga d’òc ; au burèu de l’IEO de contunhar a faire un travalh de sensibilisacion e de comunicacion pròche lu elegits e d’ajudar au manten e a la vida dau site de l’IEO-06, aise modern e indispensable de la comunicacion moderna.
2° de perseguir la formacion personala e colectiva, de s’engajar mai dins li activitats e la vida de l’associacion, lu 30 ans de la nòstra (de la vòstra) associacion ne’n son l’escasença.
3° de contunhar la produccion d’escrichs e la recerca.
E per acabar lo mieu discors, vòli repilhar embé vautres lo crit d’esper de milierats de personas a Carcassona : « Anèm ! Òc per la lenga occitana ! »
Moans lo 21 de genoier dau 2006
Joan-Pèire BAQUIE President sortent de l’IEO-06
Li presas de paraula
:
