Resson dei imatges dau Blagaire de l’IEO-06 Jan-Jaume de Niça ven de nen mandar la sieu 57ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
F.O.M.E.C !
Mèfi per lei colors. Mandatz !
Taratata Taratata Tarataratata ! (1)
Despuei que lo grand Jaume ( aqueu qu’a ren de veire emé lo nòstre, lo fiu de Joan ) lo president d’a passat temps, aqueu de la bièrra, dei pomas e dau sumò, abolissèt lo servici nacionau, son plus lei solets gusàs tot bèu just escapats de l’acné joveneta e dau certificat d’estudis primaris, mai de vertadiers professionaus, òmes e fremas, qu’asseguran encuei, au dintre coma en defòra, la seguretat e … l’espandiment culturau dau país.
Vesem aquí un bèl exemple, per lo personau feminan, de l’aplicacion perfecta de la consigna « Forma, Ombra, Movement, Esclat, Color », per restar, a la prima, dins quauque situacion que seiguèsse, lo-la (2) mai discrèt-a (2) que se pòu.
Pasmens, meme se leis afogats d’un certan Jòrgi de Ceta l’esperan, es pas de segur qu’una soleta fuelha de vinha farà mestier, per passar dau meme, Fomec, a la fònt clareta, despuei l’estiu fins l’auton …
L’estat-major, aitant estelat que pendolinat, es encara a chifrar : d’una man, totei lei economias sus lo prètz d’aquest vèstit en demai ecologic (3) e, de l’autra man, l’imatge que donariam au monde entier se, après lei casoars dei tèstas sant-cerianas e avans lo capèu chinés de la legion, aquest galòi vinharés s’espandissèt sus leis Aliscamps lo 14 de julhet …
Gisclant de son clapas lo paure Pèire Pascau bramariá : siam de farandolaires, siam pas de chocatons, siam pas de chocatons !
(1) que seigue dins un graile ò dins un fifre, de bofar ai jamai poscut ; mai sabi pas de perqué, toei leis ans, sempre lo meme jorn, per me faire tornar renar, bofa que bofarà, me tancan una candèla de mai sus lo torton (4) …
(2) l’armada de mestier, un, dos, estent duberta ai fremas la lenga nòstre dèu seguir !
(3) son tanben a cercar en riba d’en Palhon, una tanta Joana per la bugada jornadiera d’aquestei pampas …
(4) au vòstre, n’avètz dei farcejaires dau meme ?
JJ de Niça