Resson dei imatges dau Blagaire de l’IEO-06 Jan-Jaume de Niça ven de nen mandar la sieu 40ena crònica inspirada dei dessenhs umoristics que l’IEO-06 mete en rega cada setmana. Esperam que vos agraderà :
Concors L’Espina
Assegurat per totei lei membres dau burèu de l’IEO 06, escupissant un còp darrier e un còp davant, qu’an promès qu’aqueleis informacions capitalas desdorderàn pas lei confinhs de la comtea, pòdi vos afiermar que vivèm, aicí e ara, un moment istoric.
Vaquí un brave moment que siatz a vos demandar perqué totei lei botilhas d’aiga de Santa Ceselha e Santa Tècla an despareissut de totei lei botigas, despuei l’espicier dau cantonet fins qu’ais ipermercats de la Pacalia ensudada tota. Grèva dei transportaires, ocupacions d’usinas, aquelei que produson lei boutilhas, aquelei que leis emplisson, corsets jaunes ai vira-viras, ò, fan de Manon, agotament dei sorgents (pòdètz gardar engenhaire idrològ, preguieras e processions) … ren de tot aquò.
Netejatz lei besicles, levatz vos la potina dau canton deis uelhs, vaquí l’immensa novèla : lo professor L’Espina, decan de la faculta dei sciénças infusas de Valròse, mena sus una escala grandarassa, d’assais de produccion autonòme, ecologica, economica e d’empleg immediat d’electricitat idrolica.
Gramercé de tenir l’informacion secreta dau temps que lo brevet sieguesse despausat e que leis assais sieguèsson mutiplicats. Per aquò, toteis aquelei que se vestiràn d’un corset tant blu coma l’aiga, podràn s’i metre candidat. Sufís de mandar lo curriculum vitae e la letra de motivacion au burèu de l’associacion que farà seguir.
PS : se ditz que leis assajaires lei mai recercats son, fremas ò òmes, lei mai grands de talha – de mai es importanta la casuda d’aiga de mai es producha d’electricitat – e subretot, leis ancians desmamats emé coa de marluça de Sant Francés, sòca de Pipò e roge de Bellet !
JJ de Niça