Vaquí la cronica setmanièra de l’Agachaire d’aquest diménegue (dimenge) dins « La Provence », edicion deis Aups. Per informacion, aquesta cronica comencèt, l’i a mai de vint e doi ans, lo 18 de junh de 1997. Òsca !
Cronica, dau 29 de març dau 2020 en lenga nòsta per l’Agachaire
Epidemia encara
Sus lo pus vièlh registre dei deliberacions comunalas forcauqueirencas qu’avem conservat, podem legir a la pagina 86 : « Segon se’n las ordenansas fachas per lo honorable conselh de Forcalquier, demorant en la dicha villa, per lo temps de la empidimia ; lasqualas ordenansas et conselh son istadas scrichas per lo discret home Peyre Mercier, dal dich luoc, en defalhiment de notari, coma se conten en las parcellas escrichas per lo dich Peyre Mercier, lasqualas parcellas ay registradas yeu Jaume Garcin, notari dal dich conselh, en la forma et en la maniera que ay atrobat en scrich, sensa ren ajustar ny amermar, en la forma que se’n sec. »
Ieu pereu ai recopiat aquelei nòtas (« parcellas ») dau temps d’aquela « empidimia », coma disián, sensa ren apondre ni levar, a despart que li ai mes ponctuacion e majusculas a nòste biais d’encuei, mai sensa ren tocar a la grafia.
Aquí, aprenem d’abòrd que la promiera causa que faguèron, a l’estiu de 1478, fuguet de far bastir un cabana a l’intrada de la vila, per metre en quarantena les estrangiers, autrament dich lei gents qu’arribavon dau defòra : « Item pausa aver pagat a mestre Glaude Aulanhier, per la cabanna que fes al Borguet, l’estieu, per los estranges, grosses VIII. »
Just après, fèron adobar lei barris e les portaus de la ciutat, e entreprendre de lei far gardar…
Jean Yves ROYER